Rais DK. SHEIN: Wala Rushwa ndani ya CCM lazima Wajadiliwe

MJUMBE wa Kamati Kuu ya CCM Taifa, ambaye pia ni Makamu wa Pili wa Rais wa Zanzibar na Mwenyekiti wa Baraza la Mapinduzi  Balozi Seif Ali Iddi( kushoto) akisalimiana na Mwenyekiti wa CCM Mkoa wa Mjini Talib Ali Talib(kulia) hafla ya mapokezi ya Dk. Shein.

IONGOZI mbali mbali wa Chama na serikali walioudhuria hafla hiyo, Naibu Katibu Mkuu wa CCM Zanzibar Dk. Abdalla Juma Saadalla Mabodi(kulia mwanzo), Mjumbe wa Kamati Kuu ya CCM Taifa ambayepia ni Makamu wa Pili wa Rais wa Zanzibar Balozi Seif Ali Iddi(kulia wa pili), Mwenyekiti wa CCM Mkoa wa Mjini, Mkuu wa Mkoa wa Mjini na Magharib Ndg. Ayoub Mahmoud.

VIJANA wa Chipukizi wakimvisha sikafu Makamu Mwenyekiti wa CCM Zanzibar Dk. Ali Mohamed Shein katika mapokezi yake.

NAIBU Katibu Mkuu wa CCM Zanzibar Dk. Abdalla Juma Saadalla Mabodi(kushoto) akibadilisha mawazo na  Makamu Mwenyekiti wa CCM Zanzibar Dk. Ali Mohamed Shein katika hafla hiyo

BAADHI ya  viongozi wastaafu wa Chama na Serikali akiwemo Waziri kiongozi mstaafu wa Serikali ya Mapinduzi ya Zanzibar  Mhe. Shamsi Vuai Nahodha pamoja na Naibu Katibu Mkuu mstaafu wa CCM Zanzibar, Mzee Ali Ameir Mohamed wakiwa katika hafla hiyo.

BAADHI ya wanachama wa chama cha Mapinduzi walioudhuria katika hafla hiyo.

Katibu msaidizi Mkuu  Idara ya Itikadi na  Uenezi CCM Zanzibar, Daud Ismail Juma akisoma risala ya Wana CCM wa Mikoa Sita  kichama  Zanzibar.

NAIBU Katibu Mkuu wa CCM Zanzibar Dk. Abdalla Juma Saadalla Mabodi akizungumza machache kabla ya kumkaribisha mgeni rasmi katika hafla hiyo.

MAKAMU Mwenyekiti wa CCM Zanzibar ambaye pia ni Rais wa Zanzibar na Mwenyekiti wa Baraza la  Mapinduzi Dk.Ali Mohamed Shein akihutubia katika hafla ya mapokezi yake yaliyofanyika leo katika ukumbi wa CCM Mkoa wa Mjini Unguja.

MWENYEKITI wa CCM Mkoa wa Mjini, Talib Ali Talib akizungumza kwa niaba ya  Wana CCM wa Mkoa huo

MAKAMU Mwenyekiti wa Chama Cha Mapinduzi(CCM), Mwekiti wa Baraza la Mapinduzi, Dk. Ali Mohamed Shein amewataka viongozi wa chama kutosita kuwajadili wanachama ambao wanakiuka maadili ya chama hususan vitendo vya rushwa.

Pia, amesema wanachama hao wakishajadiliwa hawatasita kufukuzwa ndani ya CCM na kwamba imefikia hatua baadhi ya watu hao ambao wanafanya vitendo hivyo wanaonewa haya.

Hayo ameyasema leo , katika sherehe za kumpongeza kuchaguliwa tena nafasi ya Makamu Mwenyekiti, iliyofanyika katika ukumbi wa mikutano wa Mkoa Mjini ,ambapo aliwataka viongozi hao kutofumbia macho vitendo hivyo ndani ya CCM.

katika maongezi yake Dk.Shein ameongeza kuwa vitendo hivyo vya rushwa si jambo jipya ndani ya CCM na kwamba inaharibu sana maadili ya chama.

"Vitendo hivi vya rushwa ndani ya CCM si suala jipya lakini tunaoneana huruma, tunafichiana na baadae tunalalamikiana wakati chama ni ya wanachama hivyo lazima tushirikiane,"amesema.

Makamu Mwenyekiti huyo Dk.Shein amesema utaratibu wa chama kinajielekeza wanachama ambao wanakiuka maadili wanapaswa kujadiliwa kuanzia ngazi za tawi na baadae inawasilishwa kwenye uongozi wa juu na kuchukuliwa hatua.

Ameeleza chama kipo kwa wanachama ikiwemo kwenye mashina na matawi na taratibu zinafafanua kuwa ngazi hizo ndipo mambo hayo yanazungumzwa kwamba mwanachama akikiuka maadili anajadiliwa kwenye tawi.

"Anajadiliwa kwenye kamati ya tawi na shina, kamati ya jimbo, kamati ya wilaya, Halmashauri ya wilaya ndipo wanapojadiliwa huku kwamba anafaa ama hafai hachukuliwe hatua za kufukuzwa ama asichukuliwe,"amesema.

Makamu Mwenyekiti huyo amesema utaratibu unaeleza kuwa baada ya kujadiliwa wanachama hao taarifa itapelekwa kwenye ngazi za juu na kufanya maamuzi ya kumfukuza.

"Nachotaka kueleza kuwa kazi hii ni ya wote na kwamba jukumu kubwa ni kuhakikisha CCM inashinda mwaka 2020 msiwafiche watu ambao wanataka kuharibu chama, na kwa kufanya hivyo ni sawa na kuwa ndumi la kuhili tunayoyasema sio tunayoyafanya,"amesema  Makamu Mwenyekiti.

Amefafanua kuwa kazi ya siasa ya kipindi hiki lazima kuongeza kasi ambapo kuna mambo zaidi ya kuyafanya na hata Mwenyekiti Dk.John Magufuli alisisitiza kwenye mkutano mkuu uliofanyika Desemba 18, mwaka huu mjini Dodoma.

Mbali na hilo, Dk.Shein amewataka viongozi wa serikali kutambua na kuheshimu CCM kutokana na kuwa wanafanya kazi ya utekelezaji wa chama hivyo hawanabudi kukithamni.

Kwa upande wake Naibu Katibu Mkuu Zanzibar, Dk.Abdallah Juma Saadalla(Mabodi), amesema wanachama kutoka visiwani humo wanatarajia kusimamia vyema ibara ya tano ya kuhakikisha CCM inashinda mwaka 2020.

Ameongeza kuwa uchaguzi uliopita ulikuwa na mawimbi makubwa sana lakini watu walioshiriki walikuwa wanastahili.

"Bado tunafanya juhudi za kutoa elimu kwa viongozi wa chama kuhusu suala la kuzingatia kanuni na maadili ili kuhakikisha wanasongesha gurudu la uchaguzi wa mwaka 2020"amesema.

Dk.Mabodi ameeleza  kuwa anamshukuru Mungu kwa kuwa wagombea wote ambao wamepita kwenye uchaguzi huo asilimia kubwa wana maadili ya kutosha.