Masheha Watakiwa Kutunza kumbukumbu za Matukio ndani ya Shehia zao Zanzibar

Masheha wa wilaya ya Magharibi  “B” Unguja wametakiwa kutunza vyema kumbukumbu za matukio za maafa katika shehia zao ili kuisaidia Serikali kupata takwimu  sahihi zinazohusiana na masuala ya maafa.

Afisa ufutiliaji na tathmini kutoka Kamisheni ya kukabiliana na Maafa Mudrik Abdulla Mussa ameeleza hayo katika kikao maalum cha kuwapatia mafunzo ya kuwajengea uwezo viongozi hao kilichofanyika katika Afisi za Mkuu wa Wilaya ya Magharibi “B” Unguja.

Aidha, Afisa Mudrik amesema serikali inahitaji takwimu  sahihi zinazohusiana na masuala ya maafa kwani takwimu hizo zitaiwezesha serikali kuboresha mipango ya kukabiliana na Maafa sambamba na kufahamu athari zake kwa uchumi wa taifa. Pia amewataka viongozi wa shehia kuharakisha na kukamilisha uundaji wa kamati za Maafa za Shehia ili ziweze kufanya kazi za kukabiliana na Maafa katika Shehia kwa Ufanisi .

Akichangia katika mafunzo hayo sheha wa shehia ya kwa mchina Bi Zam Zam Ali Rijali ameiomba Kamisheni ya maafa kuendeleza utaratibu wa kuwapatia mafunzo hayo masheha na wananchi  kwa ujumla pale inapohitajika kutokana na suala la maafa kuwa linalomgusa kila mwanajamii,

Sambamba na hayo Bi Zam Zam ameomba viongozi wa shehia kupatiwa vifaa vya kukabiliana na maafa kwa lengo la kuongeza ufanisi katika utendaji wa kazi zao.

Mara baada ya kufikishiwa maombi  kutoka kwa viongozi hao wa shehia, Mkurugenzi Mtendaji wa kamisheni ya Maafa Shaaban Seif Mohamed amewaagiza Maafisa na watendaji wake kusambaza kwa haraka baadhi ya vifaa hivyo ikiwemo fomu za kutosha za kutunzia kumbukumbu kwa kila shehia kwa kuanzia na wilaya ya Magharibi “B” ambapo viongozi  wake wameshapatiwa mafunzo.

Afisa: Mawasiliano Kamisheni ya Maafa Zanzibar