MABILIONI YAVUNWA BAADA YA SERIKALI KUKODISHA MASHAMBA YA MIKARAFUU PEMBA.

PEMBA.

ZAIDI ya shilingi bilioni 14.80 zimepatikana, baada ya serikali kukodisha mashamba yake ya mikarafuu, kwenye wilaya za Wete na Mkoani kisiwani Pemba, kwenye zoezi lililoanza mwezi Julai, mwaka huu kisiwani humo.

Awali serikali ilijiwekea lengo la kukusanya shilingi milioni 200 kwenye zoezi hilo kwa Unguja na Pemba, ingawa kwa hatua za awali, lengo hilo limeshavuukwa na wilaya mbili pekee kisiwani Pemba.

Imefahamika kuwa, wilaya ya Mkoani pekee imeshaiingizia serikali shilingi milioni 760, ingawa wilaya hiyo yenye mashamba zaidi ya 80 ya serikali, bado zoezi la ukodishaji halijafungwa rasmi.

Mkuu wa wilaya hiyo Hemed Suleiman Abdalla, alisema awali baada ya kupokea taarifa ya makadirio ya serikali kwa msimu kwamba wanatarajia kukusanya shilingi million 200, alisema hizo anatarajia kuzifikia kwenye wilaya yake pekee.

Alisema, kwa sasa fedha hizo ndani ya wilaya yake pekee, ameshapindukia mara tatu na baadhi ya wilaya kama za Chakechake, Micheweni na Wete zoezi rasmi halijakamilika.

“Mimi nilipopokea taarifa za kwamba, serikali inakusudia kukusanya shilingi milioni 200 kwenye msimuu huu kupitia ukodishaji wa mashamba yake, nilitoa taarifa kwamba kiwango hicho cha fedha anakitarajia kwenye wilaya yake pekee”,alifafanua.

Aidha taarifa zinaeleza kuwa, wilaya ya Wete ambako nako zoezi rasmi halijakamilika, tayari jumla ya shilingi milioni 720 zilishapatikana, wakati wa zoezi la ukodishaji wa mashamba ya mikarafuu ya serikali.

Kaimu Afisa Mdhamini wa wizara ya Kilimo, Maliasili, Mifugo na Uvuvi Said Juma alisema zoezi hilo pamoja na kutarajiwa kuingiza fedha nyingi serikali, lakini pia litagundua mashamba mengine ya serikali.

“Zoezi hili linatarajiwa kuingiza fedha nyingi serikali, lakini twatarajia likikamilika na hata mashamba yasio na idadi yatarudi serikalini”,alifafanua.

Mkuu wa wilaya ya Chakechake Salama Mbarouk Khatib alisema, tayari jumla ya shilingi zaidi ya milioni 85 zilishapatika kwa siku ya kwanza ya uzinduzi wa ukodishaji kwenye wilaya yake.

Alisema fedha hizo zilizopatikana zilijumuisha mashamba 15 kwa siku ya kwanza ya uzinduzi wa zoezi hilo, lililofanyika mabonde ya Shemkani shehia ya Chonga wilayani humo.

“Mimi naamini kwa msimu huu na kwa utaratibu mzuri uliopo wa kisheria, basi mashamba yaliokuwa mikononi mwa watu kiholela sasa yatarudi serikali na kuongeza pato”,alifafanua.

Baadhi ya wananchi hasa wanayoyatunza mashamba hayo, wameiomba serikali kuwasilikiza kwanza, iwapo wanahati zinazokubalika kabla ya kutangaaza mnada wa hadhara.

Kombo Abdalla Kombo wa Vitongoji alisema, jengine ambalo ni vyema serikali ikawapa kipaumbele, ni kuacha kuwaunganisha na minada ya hadhara, kwani bei huwa kubwa na kushindwa kuipata.

Kwa upande wake Hamad Ussi, alisema ijapokuwa wengi wao wanayatumia mashamba hayo kutoka kwa warithi wao, lakini vyema wakaelekezwa ili waendelee kuwa nayo kisheria.

Wakati zoezi la ukodishaji wa mashamba ya mikarafuu ya serikali likiendelea, tayari zaidi ya mashamba 580 yameshagundulika, ambayo mengi yao yalikuwa mikononi mwa wananchi kinyume na tataribu, huku wilaya ya Mkoani ikigundua zaidi ya 80 pekee.