DC MICHEWENI: Bado Siridhishwi na Mwenendo wa Utendaji Kazi wa Jeshi La Polisi

 

MICHEWENI     07/11/2017

Mkuu wa wilaya ya Micheweni Salama Mbarouk Khatib amewataka watendaji wa jeshi la polisi wilayani humo kutekeleza wajibu na majukumu yao ipasavyo ili waweze kuleta mabadiliko ndani ya wilaya hiyo.

Kauli hiyo ameitoa wakati alipokuwa akizungumza na wakuu wa vituo vya polisi viliomo ndani ya wilaya hiyo kikao kilichofanyika katika ukumbi wa mikutano wa ofisi ya mkuu wa wilaya ya Micheweni.

Amesema haridhishwi na mwenendo wa utendaji wa vituo hivyo pamoja upokeaji wa kesi za udhalilishaji, hivyo wakati sasa umefika kwa kila mmoja kufanya kazi ipasavyo ili kukomesha matendo hayo.

Bi salama amesema wilaya ya Micheweni inatakiwa kuwa mfano wa kuigwa na wilaya nyengine dhidi ya mapandano na watendaji wa matendo hayo na kuahidi kuwachukulia hatua kali za kisheria ambao watasababisha kukwama kwa kesi hizo.

Kwa upande wake mkuu wa kituo cha polisi Micheweni Koplo Khatib Sauti amesema kesi 15 za udhalilishaji zimeripotiwa kituoni hapo kuanzia Januari hadi Novemba mwaka huu na kesi nne ndio ambazo zimeshapelekwa mahakamani.

Amesema jamii bado haijakuwa na muamko wa haraka wa kuripoti kesi hizo pale tu zinapotokea na badala yake huripoti kesi hizo baada ya wiki moja na zaidi jambo ambalo linapelekea watuhumiwa kukimbia.