Rais Dk Shein akunwa na Juhudi za Wizara ya Ujenzi,Mawasiliano na Usafirishaji

RAIS wa Zanzibar na Mwenyekiti wa Baraza la Mapinduzi Dk. Ali Mohamed Shein ameupongeza  uongozi wa Wizara ya Ujenzi, Mawasilaino na Usafirishaji kwa juhudi kubwa unazozifanya katika utekelezaji wa kazi zake na kusisitiza haja ya kuongeza kasi sambamba na kuimarisha umoja na mashirikiano.

Dk. Shein aliyasema hayo leo, Ikulu mjini Zanzibar alipokutana na uongozi wa Wizara ya Ujenzi, Mawasiliano na Usafirishaji ilipowasilisha utekelezaji wa Mpango Kazi wake kwa  Mwaka 2016/2017, Mpango Kazi wa Utekelezaji kwa mwaka 2017/2018 na Utekelezaji wake kwa  kipindi cha robo ya kwanza ya Julai hadi Septemba, 2017.

Aliongeza haja ya kuendeleza vyema majukumu na utekelezaji wa kazi na kusisitiza umuhimu wa kutekeleza uongozi kwa kuonesha njia kwa mashirikiano na umoja ili kufikia malengo yaliokusudiwa.

Alieleza kuwa Mpango Kazi wa Wizara hiyo umewafanywa vizuri na kupongeza kwa hatua hiyo iliyotokana na kuongozwa vyema na uongozi wa uliopo Wizarani na kusisitiza kuongeza zaidi viwango vya kuongoza ili na wale wanaoongozwa wapate kufuatia njia sahihi katika kuleta ufanisi na tija katika kazi zao.

Aidha, Dk. Shein alieleza haja ya kuwepo kwa vikao kati ya viongozi na watendaji wao hatua ambavyo husaidia kwa kiasi kikubwa kuondosha changamoto zilizopo sambamba na kujenga uhusiano, mapenzi na mustakabali mwema kati ya viongozi na watendaji wote wa Wizara.

Alieleza kuwa kwa vile Wizara hiyo ina mambo matatu makubwa yakiwemo ujenzi, mawasiliano na usafirishaji hivyo, ni vyema uongozi huo ukafanya kazi kwa pamoja katika kuyatekeleza mambo hayo ambayo ni makubwa na muhimu katika kuwatumikia wananchi pamoja na kuleta maendeleo endelevu kwa Zanzibar.

Pia, Dk. Shein alisisitiza suala zima la utafiti katika Wizara hiyo na kueleza kuwa kila eneo la Wizara hiyo linahitaji kufanyiwa utafiti kwa azma ya kutoa majibu kutokana na changamoto zilizopo, na kueleza kuwa kuundwa kwa Idara za Sera, Mipango na Utafiti katika kila Wizara za SMZ kuna lengo la kuinua Utafiti na kueleza kuwa fedha za utafiti zipo jambo kubwa ni kujipanga na kuwa tayari katika kutekeleza suala hilo.

Nae Makamo wa Pili wa Rais wa Zanzibar Balozi Seif Ali Idd aliupongeza uongozi wa Wizara hiyo pamoja na watendaji wake wote kwa mafaniki waliyoyapata na kusisitiza umuhimu wa kuimaarisha mashirikiano ili Wizara hiyo izidi kupata mafanikio zaidi.

Aidha, alisisitiza haja ya kuangaliwa vyema miundombinu ya Mji Mkongwe wa Zanzibar zikiwemo nyaya za umeme katika kuta za nyumba za mji huo na kueleza haja ya kushirikiana kati ya uongozi wa Mji Mkongwe na Shirika la Umeme Zanzibar (ZECO) ili kuziweka vyema nyaya hizo ili mji huo uwendeleze haiba yake sambamba na usalama kwa wananchi.

Nae Kaimu Katibu Mkuu Kiongozi na Katibu wa Barza la Mapinduzi ambaye pia, ni Katibu Mkuu Ofisi ya Rais na Mwenyekiti wa Baraza la Mapinduzi Salum Maulid alitoa pongezi za kwa Wizara hiyo na kusisitiza haja ya uwajibikaji kazini huku akieleza umuhimu wa kwenda kwa mwendo kasi katika suala zima la mawasiliano hasa kutokana na kukua kwa sayansi na teknolojia ulimwenguni.

Waziri wa Wizara ya ya Ujenzi, Mawasiliano na Usafirishaji  Balozi Ali Abeid Karume alisema kuwa Wizara inatekeleza majukumu yake kwa kuzingatia miongozo mbali mbali ambayo imewekwa na Serikali ikiwemo Dira ya Taifa ya Maendeleo (Vision 2020), MKUZA III, Ilani ya Uchaguzi ya CCM ya mwaka 2015-2020, Sera ya Taifa ya Usafiri Zanzibar (2008), Sera ya TEHAMA, Sera ya Taifa ya Nyumba na Mpango Mkuu wa Usafiri yaa mwaka 2009.

Kwa upande wa usalama wa vyombo vya moto pamoja na watumiaji wote wa barabara, alieleza kuwa Wizara imefanikiwa kufanya ukaguzi wa vyombo vya moto vya aina mbali mbali Unguja na Pemba ili kuhakaikisha viko katika hali uzima na usalama.

Aidha, alieleza kuwa Wizara imekamilisha kuandaa kanuni za adhabu za papo kwa papo kwa lengo la kuwadhibiti madereva wanaovunja taratibu za usafiri wa barabara na kwa sasa taratibu za kuanza kutumika kanuni hizo zinaendelea.

Aliongeza kuwa Wizara katika udhibiti wa maeneo ya wazi ndani ya Mji Mkongwe imefanya uhakiki wa maeneo ya wazi pamoja na kufanya vikao na watumiaji wa maeneo hayo juu ya namna ya kuweza kushirikiana katika kuyahifadhi.

Pia, alieleza kuwa Wizara imefanikiwa kufanya usajili wa Kampuni inayojulikana kwa jina la ‘Zanzibar Internationa Maritime Service Limited’ nchini Falme za Kiarabu UAE na hivi sasa Kampuni hiyo imeshaanza kufanya kazi ya usajii wa meli za Kimataifa kwa niaba ya Mamlaka ambapo pia, Wizara imefungua Ofisi ya Usajili wa meli za Kimataifa huko Dubai.

Sambamba na hayo, Waziri Karume alieleza kuwa Wizara imenza maandalizi ya kununua meli mpya ya mafuta ambayo itasaidia kuongeza huduma za upatikanaji wa mafuta hapa Zanzibar.

Aliongeza kuwa katika vipaumbele vilivyowekwa na Wizara hiyo katika mwaka wa fedha wa 2017/2018 ambavyo miongoni mwao ni kuanza kwa ujenzi wa barabara ya Bububu-Mahonda hadi Mkokotoni wenye urefu wa kilomita 31, kuendeleza ujenzi wa barabara ya Ole hadi Kengeja kilomita 35, kuanza kwa ujenzi wa barabara ya Koani hadi Jumbi kilomita 6.3 pamoja na kutekeleza ahadi za Rais wa Zanzibar katika kukamilisha barabara za Unguja na Pemba.

Nao uongozi wa Wizara hiyo ulitoa pongezi kwa hatua ya Rais Dk. Shein ya kuka pamoja na viongozi wa Wizara za Serikali ya Mapinduzi ya Zanzibar na kujadili kwa pamoja masuala mbali mbali ya Mpangokazi hatua ambayo inajenga zaidi ufanisi wa kazi na kuzidisha ari ya kwenda kuwatumikia wananchi.

Uongozi huo pia, ulieleza kusikitishwa kwake na hujuma za makusudi zinazofanywa na baadhi ya watu wasioitakia mema Serikali ya Mapinduzi ya Zanzibar pamoja na wananchi wake kwa kufanya hujuma za makusudi katika meli mpya ya MV Mapinduzi II.

Rajab Mkasaba, Ikulu Zanzibar

Postal Address: 2422 Tel.:0777427449. Fax: 024 2231822 

 E-mail: rajabmkasaba@yahoo.co.uk