Kesi 112 za Udhalilishaji Mkoa wa Kaskazini Pemba Zaripotiwa

 

JUMLA YA KESI 112  ZA MAKOSA YA UDHALILISHAJI WA WANAWAKE NA WATOTO ZIMERIPOTIWA KATIKA MKOA  WA KASKAZINI PEMBA  KWA KIPINDI  CHA KUANZIA MWEZI JUNAURI HADI OKTOBA MWAKA HUU  .

Takwimu hizo zimetolewa na Mkuu wa Mkoa huo Mhe Omar Khamis Othman  wakati akitoa taarifa ya utekelezaji wa maagizo ya Mhe Rais wa Zanzibar na  Mwenyekiti wa Baraza la Mapinduzi aliyoyatoa wakati wa ziara yake aliyoifanya katika mkoa huo Kisiwani Pemba .

Mkuu wa Mkoa  amewashukuru wananchi waliojitokeza kutoa taarifa juu ya matendo hayo na kuwataka wananchi kuendelea kushirikiana na serikali kuviripoti vitendo vya udhalilishaji  katika maeneo yao ili wahusika waweze kuchukuliwa hatua za kisheria.

Aidha Mkuu huyo wa Mkoa amewasisitiza wananchi kuacha kuyafumbia macho matendo hayo na badala yake wayaripoti sehemu husika pindi yanapotokea katika maeneo yao .

Mapema  Katibu Tawala Mkoa huo Amhed Khalid Abdalla amesema utekelezaji wa maagizo ya Mhe Rais katika Mkoa huo yamekamilika kwa asilimia kubwa kwani Serikali ya Mkoa kupitia vyombo vyake imeweza kusimamia na kufuatilia hatua kwa hatua .

Hivyo amewataka wananchi kushirikiana na Serikali  kutunza miradi ambayo utekelezaji wake umekamilika ili iweze kutumika kwa muda mrefu kwa manufaa ya umma.