Utafiti wa Udongo kwa Wakulima Wahimizwa Pemba

WIZARA ya Kilimo , Maliasili , Mifugo na Uvuvi imeshauriwa kufanya utafiti wa udongo  katika mabonde ya Likoni na Kichangani ili kuwapa maelekezo ya kitaalamu wakulima juu ya  udongo na mbolea ambazo zinaendana  na kuwafanya wakulima waweze kuzalisha chakula cha kutosha kujikimu .

Katibu Tawala Wilaya ndogo Kojani Makame Khamis Makame amelazimika kutoa ushauri huo baada ya kutembelea bonde ya Likoni na Kichangani ambapo wakulima wamedai kuwa ni mabadiliko ya tabianchi baada ya mazao yao kutostawi vyema .

Amesema pamoja na mabadiliko ya tabianchi , lakini iko haja kwa Wizara ya Kilimo kufanya utafiti wa udongo katika bonde hilo ili wakulima waweze kujua aina ya mbolea ambazo zinafaa kutumika katika mashamba yao.

Makame ameeleza kwamba wakulima wa kunde katika mabonde hayo wameitikia wito wa Serikali kulima kwa wakati pamoja na kuzitumia mvua za vuli ambazo zimenyesha , lakini bado wanakabiliwa na changamoto ya kutojua aina ya mbolea inayofaaa kutumiwa .

“Tutaikumbusha Wizara ya kilimo kufanya utafiti wa udongo katika bonde hili , kwani wakulima bado wanabahatisha kutumia mbolea wakati mwengine haziendani na udongo uliopo ”alieleza.

Nao wakulima wa kunde katika bonde hilo wamesema kwamba mbali na changamoto  hiyo pia wanakabiliwa na tatizo la wadudu a ina ya wadudu mafuta (Aphids)  wanaoharibu mazao yao .

Kiula Juma Hija amesema kwamba wadudu hao wanakuwa ni kero kubwa kwa wakulima wa kunde , ambapo hata utaalamu wa kunyunyiza dawa wanaufanya kwa njia ya kienyeji .

Amefahamisha kwamba , njia ambazo wanazitumia ni kuchanganya dawa kwenye ndoo , na kuanza kunyunyiza kwa kutumia vitambaa na baada ya hapo chombo ambacho kimetumika hurejea na kutumika kwa mahitaji mengine ya nyumbani.

Akizungumzia changamoto hiyo , Afisa Maendeleo ya Kilimo Wilaya ya Wete Makame Hamad Said amefafanua kwamba wanajipanga kuwapatia mabomba ya kunyunyiza dawa kwa kila kanda bomba moja ili kulinda usalama wa afya zao.

Amesema njia ambazo wanatumia wakulima hao zinahatarisha usalama wa maisha yao kwani dawa ni sumu na wanatakiwa vyombo wanavyovitumia visitumike kwa shughuli nyengine majumbani.

“Hii ni hatari sana kwa usalama wa maisha yao , tunajipanga kuwapatia bomba moja kila kanda kwa kuanzia ili kuwafanya watekeleze majukumu yao kwa ufanisi zaidi ”alifahamisha.

Aidha mwandishi wa habari amebaini kwamba  Zanzibar hakuna maabara ya udongo ambapo , uchunguzi wa udongo hulazimika kupelekwa kwenye maabara ya Arusha  pamoja na Mlingani Mkoa wa Tanga.
Na Massanja Mabula