Kamanda wa Polisi Mkoa Kusini Pemba: Vifo vilivyotokana na Ajali za Barabarani 2017 ni Watu Wanane, 10 Majeruhi

JUMLA ya watu wanane (8) wamefariki dunia na wengine kumi (10) kujeruhiwa, kwa ajali za barabarani zilizotokea mwaka jana Mkoa wa Kusini Pemba.

Akizungumza na mwandishi wa habari hizi, Kamanda wa Polisi Mkoa huo, Sheikhan Mohamed Sheikhan, alisema  jumla ya matukio 18 ya ajali barabarani yaliripotiwa Mkoani humo.

Alieleza  kati ya watu wanane waliofariki, wanaume walikuwa saba na mwanamke mmoja, ambapo waliojeruhiwa walikuwa ni watu kumi kutokana na ajali za barabarani zilizotokea mwaka 2017.

“Tunashukuru ajali za barabarani zimepungua, kuna punguzo la matukio mawili sawa na asilimia kumi, kwani mwaka 2016 yalipotiwa matukio 20 na mwaka jana yaliripotiwa matukio 18 ya ajali barabarani”, alisema Sheikhan.

Kamanda huyo, alisema  jumla ya makosa 2,928 ya usalama barabarani yalikamatwa mwaka jana, ambapo makosa 1135 yalipelekwa mahakamani, makosa 85 yako kwenye upelelezi, kesi 70 zinaendelea mahakamani, kesi 1071 zilifungwa Polisi na kesi 1692 zilipata hatia.

 Alieleza kutokana na makosa hayo ya usalama barabarani waliweza kupata tozo ya Tshs, milioni 36,666,100/= kwa mwaka 2017 katika Mkoa wa Kusini Pemba.

Kamanda sheikhan, alisema mwaka huu wamejipanga   katika kuhakikisha ajali za barabarani zinaepukika, kwa kuendelea kufanya doria, msako na kuengeza Askari makoti kusaidia Askari wa barabarani.

Aidha Kamanda huyo, aliwataka watendaji wa Jeshi hilo kuepuka tabia ya kudai na kuchukua rushwa, ili kuondosha kabisa makosa ya usalama barabarani yasitokee.

“ Mwaka huu tumejipanga katika kuhakikisha rushwa haitendeki maana iwapo Askari watakula rushwa makosa ya haya yataendelea kuwepo kila siku”, alisema Kamanda.

Hivyo aliwataka madereva kutii sheria bila shuruti, ili kuepuka makosa hayo na kupunguza ajali zinazoweza kuepukika.