RC kusini Pemba: Nitakula sahani moja na masheha wanajivisha koti la uhakimu kesi za udhalilishaji

 
MKUU wa Mkoa wa kusini Pemba, Mhe: Hemed Suleiman Abdulla, mewajia juu masheha wa mkoa wake kwamba, watakosa kazi mara moja na kisha sheria kufuata mkondo wake, iwapo hawatoiwacha tabia yao ya kujifanya mahakimu  kwa kuzifanyia sulhu kesi za udhalilishaji.

Alisema kuanzia sasa katika kutokomeza matedo hayo ndani ya mkoa wake, masheha wanaovaa koti la uhakimu, walivue mara moja, maana hilo haliisaidia jamii kupunguza matendo hayo.

Akizungumza na mwandishi wa habari ofisini kwake katika kutomeza matendo hayo, alisema kama wapo masheha wanafanya sulhu, basi sasa wakati umefika wa kubadili tabia hiyo, vyenginevyo hatua dhidi yao itafuata.

Alisema, kwa sasa Mkoa umeshaunda kamati maalumu ya kupinga udhalilishaji wa kijinsia, hivyo kila mmoja wakiwemo hao masheha lazima wakijite katika kumaliza kesi hizo kwa kuzisimamia hadi vyombo vya sheria.

“Masheha wao kazi yao kwenye kesi hizi za udhalilishaji zenye sura ya jianai, wazishughulikie na kuzifikisha mbele ya vyombo vya sheria, ili wakosaji wapate hukumu”,alisema.

Katika hatua nyengine Mkuu huyo wa Mkoa wa kusini Pemba Mhe: Hemed Suleiman Abdulla, alisema lazima kila mmoja kwa nafasi yake, iwe ni Jeshi la Polisi, waendesha mashitaka, jamii na mahakimu, wawajibike ili kutokomeza matendo hayo.

Kamanda wa Polisi Mkoa huo, Shehan Mohamed Shehan alisema, jamii inayonafasi kubwa ya  kutokomeza matendo hayo, kwa kukubali kufika mahakamani, kutoa ushahidi.

Alisema vyombo vya sheria pekee haviwezi kutokomeza vitendo hivyo, pasi na jamii kushirikiana na mahakama kutoa ushahidi kwa wakosaji.

“Leo wananchi huwa wakali wakianza kupata kesi ya udhalilishaji, lakini ikifika siku ya kutoa ushahidi mahakamani, huanza kujitia sababu na hatimae kesi kufutwa kwa kukosa ushahidi”,alieleza.

Kwa upande wake Mwansheria dhamana wa ofisi ya Mkurugenzi wa Mashitaka Ali Rajab Ali, alisema jamii ndio pekee ambayo ina nafasi kubwa ya kutokomeza matendo hayo.

“Kama wakijipangia mikakati ya kweli na kushirikiana kikamilifu na vyombo vya sheria, basi itakuwa ni dawa mwafaka ya vitendo vya udhalilishaji kama ubakaji au ulawiti kumaliza”,alifafanua.

Mratibu wa wanawake na watoto shehia ya Kangagani Awena Salim Kombo, alisema tatizo la jamii kutopenda kutoa ushahidi kwa changamoto zilizoko mahakamani, hakusaidia kutokomeza vitendo hivyo.

Mzazi ambae mwanawe alifanyiwa ulawiti wa shehia ya Kiungoni alisema, changamoto kubwa inayodhoofisha kuzimaliza udhalilishaji, ni Jeshi la Polisi kwa kuzifanyia sulhu kesi hizo.

“Polisi lazima wajipange vyema ili kuhakikisha, hawazifanyii sulhu kesi hizo, maana kumekuwa na tuhuma za kuchukua rushwa na kuzimalizia kienyeji pale pake kituo cha Polisi”,alifafanua.

Mratibu wa miradi ya kutoka TAMWA Asha Abdi Makame, alisema sasa wakati kwa wakosaji wa udhalilishaji, kupewa udhabu kali hadi kifungo cha maisha, ili kutomeza matendo hayo.

“Wakosaji wa matendo ya udhalilishaji, wamekuwa wakijirejea siku hadi hadi, kutokana na adhabu wanayopewa mahakamani kuwa ndogo”,alisema.

Baadhi ya watoto ambao walishafanyiwa udhalilishaji, wamependekeza kwa vyombo husika, kuhakikisha wanawaadabisha wazazi na walezi wao, wanaozifanyia sulhu kesi hizo.

Afisa Ustawi wa jamii wilaya ya Wete Haroub Suleiman Hemed, alisema udhalilishaji, hauwezi kuondoka iwapo vyombo mbali mbali havikushirikiana kwa pamoja.

Sheha wa shehia ya Shamiani wilaya ya Mkoani Safis Khamis Ngwali, alisema bado tatizo lipo kituo cha Polisi, kwa kuwabembeleza waliodhalilishiwa, kufanya sulhu na pande nyengine.

“Inawezekana hawa Polisi wetu hawapendi kwenda mahakamani kutoa ushahidi na ndio maana, hupendelea sana kesi za udhalilishaji zimalizike kienyeji pale pale mapokezi”,alisema.

Hata hivyo Katibu wa baraza la vijana shehia ya Chambani Zuwena Nassor Salum, alisema vijana wasipotaka kubadili tabia na kuachana na matendo ya udhalilishaji pasitarajiwe miujuzi ya kuvilamaliza vitendo vya udhalilishaji.

Katika wilaya ya Wete pekee, kuanzia mwaka 2015 hadi mwezi Oktoba mwaka huu kuliripotiwa matukio 600 za udhalilishaji, wakati 63 yalihusua ulawiti pekee, ambapo na juzi kulikamatwa watoto 12 wakilawitiana.