Baba Miaka 59 Mbakaji wa Binti Miaka 11, Atupwa Jera Miaka Saba KAS PEMBA

HATIMAYE  kesi ya ubakaji iliyomuhusu Idrisa Ali Hamad (muki) 59 wa Sellem ya kumbaka mtoto wa kike mwenye umri wa miaka 11 imefikia tamati baada ya mahakama ya mkoa kumtia hatiani.

Akisoma hukumu kwa mshitakiwa Mrajis wa Jimbo Mahakama Kuu Pemba Hassein Makame Hossein amesema mahakama imeridhika na ushahidi uliotolewa na upande wa mashtaka na hivyo kumwamuru aende chuo cha mafunzo kwa kipindi cha miaka saba pamoja na kumlipa mwathiriwa fidia ya shilingi milioni mbili .

Kesi hiyo ambayo ilikuwa imevuta hisia za watu ndani ya Mkoa wa Kaskazini Pemba , hasa baada ya hakimu wa mahakama ya mkoa makame mshamba simgeni kujitoa kusikiliza  hapo alifurika katika mahakama hiyo ili kujua hatma na kesi hiyo .

Mapema mwendesha mashtaka wa serikali ramadhan Suleiman ramadhan aliiomba mahakama kutoa adhabu kali kwa mujibu wa sheria ili iwe fundisho kwake na wengine na kudai kwamba matendo hayo yanazidi kushamiri siku hadi siku .

Akitoa utetezi mahakamani hapo wakili wa mshitakiwa mohammed ali aliiomba mahakama impunguzie adhabu mteja wake imtoze faini badala ya kifungo kwani sheria inakubaliana na hilo huku akidai kwamba mteja wake anasumbuliwa na magonjwa mbali mbali ikiwemo kisukari , presha na figo.

"Naiomba mahakama impunguzie adhabu mteja wangu ikiwa ni pamoja na kumtoza faini badala ya kifungo kwani sheria inakuliana na hilo , na pia mteja wangu anasumbuliwa na ugonjwa wa presha , figo na kisukari " alieleza.

Hukumu hiyo imepokelewa vyema na baadhi ya wananchi  ambao wameelezea kuridhishwa na hatua hiyo kwani kesi hiyo imechukua muda mfupi hadi kutolewa uwamuzi wake.

"Hivi ndivyo tunavyotaka , kesi ikifikishwa mahakamani ishughulikiwe haraka na wananchi watajenga imani na chombo cha mahakama ambacho kinakazi ya kutafsiri sheria " alisema Katibu Tawala Mkoa Ahmed Khalid Abdalla .

Muki alitenda kosa hilo  disemba 2 /2017 , huku nyumbani  kwake Sellem  majira ya saa kumi na moja na nusu za jioni  ambapo jumla ya mashahidi sita kwa upande wa mashitaka walitoa ushihidi wao huku mashahidi wawili walifikia kutoa ushahidi wa upande wa mshitakiwa .