Wakamatwa na Vifurushi 25 vya Bangi KAS PEMBA

WATU wawili wakaazi wa Mkoa wa Tanga wanashikiliwa na Jeshi la Polisi Mkoa wa Kaskazini Pemba baada ya kukamatwa wakiwa na mafurushi  ishirini na tano (25)  ya majani makavu yanayosadikiwa kuwa ni bangi yenye uzito wa kilo tano na nusu.

Wawili hao ambao wako chini ya ulinzi wa Polisi la Polisi ni Seif Yussuf Msumari pamoja na Shadia Stephano wako wakaazi wa Mkoa wa Tanga.

Akizungumza ofisini kwake Kamanda wa Polisi Mkoa wa Kaskazini Pemba Kamishna msaidizi Haji Khamis Haji amesema watuhumiwa hao wamekamatwa na askari katika eneo la bandari ya wete.

Amesema kuwa jeshi la polisi bado linaendelea kuwahoji watuhumiwa na upelelezi ukikamilika watfikishwa mahakamani kujibu tuhuma ambazo zinawakabili .

“Kwa sasa tunaendelea kuwahoji na upelelezi ukikamilika watafikishwa mahakamani kujibu tuhuma ambazo zinawakabili ” alifahamisha.

Amesema kwa upande wa Jeshi la polisi wamejipanga kuendesha misako na operesheni sehemu za bandari , madago pamoja na maeneo mengine yanayodhaniwa kutumika kupitisha dawa za kulevya ili kuweza kutimiza lengo la kutokomeza biashara haramu ya dawa za kulevya.

“Hizi operesheni tunazoendelea nazo ni endelevu , lengo ni kuhakikisha wananchi wanaishi salama bila ya kutumia dawa za kulevya ”alieleza Kamanda.

Aidha kmanda haji amewataka wananchi kuendelea kushirikiana na jeshi la polisi kwa kutoa taarifa sahihi ambazo zitafanikisha kuwakamata wanaojihusisha na biashara ya dawa za kulevya .

Amesema jeshi la polisi linahitaji ushirikiano kutoka kwa wananchi pamoja na vikosi vyengine vya ulinzi katika kufanikisha azma ya kukabiliana na biashara hii , hivyo ni vyema kila mmoja akatambua kwamba vita ya dawa za kulevya ni ya wote.