Maradhi ya Mripuko 'Kufagia' Wanafunzi 1,622, Sikuli ya UONDWE Kisiwani Pemba

WANAFUNZI wa Skuli msingi Uwondwe Shehia ya Mtambwe , wako hatarini kupata maradhi ya mripuko iwapo hatua za haraka hazitachukuliwa kulipatia ufumbuzi tatizo la upungufu wa matundu ya vyoo skulini hapo.

Skuli hiyo kongwe kisiwani Pemba yenye wanafunzi 1622 , ina jumla ya matundu ya vyoo matatu yaliyojengwa kabla ya Mapinduzi ambayo kwa sasa yanahatarisha usalama wa wanafunzi .

Mwalimu mkuu wa skuli hiyo Khadija Said Khalfan amemwambia Mkuu wa Mkoa wa Kaskazini Pemba kuwa  uongozi wa skuli umelazimika kuzuia matumizi ya vyoo ambavyo vimejengwa kabla ya mapinduzi , na hivyo kuwafanya baadhi ya wanafunzi kujisaidia kwa kutumia vichaka vilivyojirani na skuli

“Tuna matundu matatu ya vyoo , na idadi ya wanafunzi ni 1622 wakiwemo watoto wadogo wa maandalizi , hivyo hulazimika kutumia vichaka jambo ambalo linahatarisha usalama wa maisha ya wanafunzi ”alieleza.

Picha na Maktaba

Akizungumzia suala la upasishaji wa wanafunzi , Khadija amesema sio mzuri na kutaka tatizo la upunguzu wa walimu ni sababu ya matokea mabaya katika skuli hiyo .

Amesema kuwa iwapo changamoto hiyo itapatiwa ufumbuzi , matokeo ya wanafunzi yatakuwa mazuri kwani walimu watakuwa na muda wa kutosha kupitia masomo ya wanafunzi.

Naye Mkuu wa mkoa wa Kaskazini Pemba  Omar Khamis Othman ambaye amefanya ziara ya kushtukiza skulini hapo , ameeleza kusikitikishwa na kitendo cha wakaazi wa shehia hiyo kuyaziba baadhi ya matundu ya vyoo

.

Amesema kitendo hicho ambacho kimefanywa na wananchi wa Mtambwe kinapaswa kulaaniwa na kila mpenda maendeleo kwani kinarudisha nyuma harakati za Serikali za kuboresha kiwango cha elimu.

“Kwa mtu mwenye imani na mpenda maendeleo hawezi kufanya kitendo kama hicho kwani kuziyaba matundu ya vyoo kunawafanya wanafunzi watumie vichaka , ambapo kwa kipindi cha mvua ni hatari wa usalama wa watoto ”alisisitiza.

Aidha Mkuu wa Mkoa ameahidi kuzungumza na wananchi wenye asili ya Mtambwe kuwashawishi kusaidia maendeleo ya skuli hiyo .

“Mtambwe ina vijana wengi wasomi na wanasiasa wazuri , lakini wameshindwa kujitokeza kusaidia maendeleo ya skuli yao , kwa hivyo Serikali ya Mkoa itafanya juhudi kuwatafuta na kuwashawishi kusaidia kuzipatia ufumbuzi tatizo hili ”alisema .

Sheha wa Shehia ya Mtambwe Kaskazini Bakar Suleiman Khamis amesema licha ya Mwakilishi wa Jimbo la Mtambwe Khadija Kibano kuishi umbali usio zidi mita mia tano kutoka ilipo skuli , lakini ameshindwa kutembelea na kuangalia matatizo yaliyopo.

Skuli ya Uwonde imejengwa mwaka 1934 , inakabiliwa na changamoto pia ya upungufu wa walimu ambapo kwa sasa inajumla ya walimu 19 na vyumba vya madarasa 22.

 Na Masanja Mabula