Mpango wa lishe kwa kaya masikini wazinduliwa

 

MFUKO wa Maendeleo ya Jamii Tanzania (TASAF III), kwa kushirikiana na Shirika la Umoja wa Mataifa la kuhudumia Watoto (UNICEF), umezindua mradi wa kustawisha maisha kwa ajili ya kuboresha afya na lishe kwa akinamama na watoto wanaoishi katika kaya masikini.

Mratibu wa TASAF III Zanzibar, Makame Ali Haji alieleza hayo katika uzinduzi wa mradi huo hafla ambayo iliyofanyika Bumbwini wilaya ya Kaskazini ‘B’ Unguja.

Alisema imebainika kwamba akina mama na watoto wamekuwa wakikabiliwa na tatizo ya ukosefu wa lishe ya kutosha na hivyo kushindwa kumudu kuendesha familia zao vizuri.

Alisema mpango huo kwa kiasi kikubwa utatoa nafasi kwa akinamama kupata lishe bora kwa kutumia vyakula vyenye mpangilio ikiwemo mboga na matunda.

Mratibu huyo alifahamisha kuwa mpango huo umeanza kwa majaribio katika mikoa miwili ya Jamhuri ya Muungano wa Tanzania, ambapo kwa Zanzibar ni mkoa wa Kaskzini Unguja na halmashauri ya Mbeya vijijini Tanzania bara.

”Mpango wa kustawisha maisha ni sehemu ya utekelezaji wa mfuko wa maendeleo ya jamii wa kunusuru kaya masikini awamu ya tatu ambapo kwa sasa tumelenga zaidi katika kuwahusisha akinamama na watoto katika kuimarisha lishe zao kuwa bora”,alisema.

Alisema TASAF III imejikita zaidi katika kupambana na umasikini ikiwa ni sehemu ya utekelezaji wa ilani ya Chama cha Mapinduzi na mpango wa kukuza uchumi mkuza namba tatu.

Mtaalamu wa mafunzo na ushirikishwaji jamii kutoka makao makuu ya Tasaf Dar es Salaam, Mercy Mandawa alisema mpango huo umebuniwa na Tasaf kwa kushirikiana na shirika la Umoja wa Mataifa la kuhudumia Watoto (UNICEF) kwa ajili ya kuimarisha na kukuza afya za akinamama na watoto kuwa bora.

 CHANZO: ZANZIBARLEO