Waziri Mohamed: Saratani Mlango wa Kizazi inazuilika

WAZIRI wa Afya, Hamad Rashid Mohamed, amesema, Ugonjwa wa Saratani ya mlango wa kizazi unazuilika kwa chanjo, hivyo amewataka wasichana kupata chanjo hiyo mara itakapoanza kutolewa hivi karibuni.

Hayo ameyasema wakati alipofungua mkutano wa uhamasishaji kwa wakuu wa mikoa na wilaya juu ya uanzishwaji wa chanjo mpya ya kinga dhidi ya saratani ya mlango wa kizazi jana.

Amesema, saratani ya mlango wa kizazi ndio inayoongoza kwa kuathiri akinamama wengi nchini Tanzania ikiwemo Zanzibar ambapo akinamama 51 kati ya 100,000 moja wanaathirika na ugonjwa huo.

Aidha, amesema, akinamama 38 kati ya 100,000 hufariki kila mwaka kwa saratani hiyo na inakadiriwa kuwa wastani wa wanawake 466,000 wanagundulika kuwa na saratani ya mlango wa kizazi kila mwaka na wengi wanaoathirika wanatokea nchi zinazoendelea.

Hivyo, amewataka wananchi kuitumia fursa hiyo   ambapo amesema chanjo hiyo ni salama na imethibitishwa na Shirika la Afya la Kimataifa (WHO) na itatumika kwa wasichana wenye umri wa miaka 9 hadi 14.