Privinvest, ATM zakaribishwa kuwekeza Zanzibar

 

RAIS wa Zanzibar na Mwenyekiti wa Baraza la Mapinduzi Dk. Ali Mohamed Shein amezikaribisha kampuni ya Privinvest na Advanced Marine Transport (AMT), kutoka nchini Dubai zinazotengeneza meli za aina mbali mbali kuja kuekeza visiwani hapa.

Dk. Shein aliyazikaribisha kampuni hizo wakati alipofanya mazungumzo wake Jean Boustany ikulu mjini Zanzibar, aliyefuatana na Balozi mdogo wa Tanzania nchini Dubai, Ali Jabir Mwadini ambapo mwakilishi huyo alieleza dhamira ya kampuni hizo kuekeza Zanzibar.

Dk. Shein alieleza kuwa Serikali ya Mapinduzi ya Zanzibar iko tayari kutoa ushirikiano na kuweka mazingira mazuri katika kuhakikisha azma ya kampuni hizo inatimia kuwekeza hapa Zanzibar.

Alisema azma ya kampuni hizo imekuja wakati muafaka ambapo Zanzibar imo katika mikakati ya kutekeleza uchumi wa bahari ambapo hatua hiyo imeonesha mwanzo mzuri kwa Zanzibar kufikia hatua hiyo.

Aidha, alimuueleza Mwakilishi huyo kuwa lengo la kampuni hizo kuja kuekeza Zanzibar itasaidia kuendeleza historia ya Zanzibar ya kuwa kituo kikuu cha biashara katika ukanda huu wa Afrika Mashariki na Kati ambapo shughuli hizo zilianza tokea miaka ya 1899 hapa Zanzibar.

Dk. Shein alimueleza kiongozi huyo kuwa serikali ya Mapinduzi ya Zanzibar iko tayari kushirikiana na kampuni hizo na kueleza hatua itakayofuata kwa viongozi wa serikali kukaa na uongozi wa kampuni hizo kwa lengo la kuangalia utekelezaji wa azma hiyo.

Dk. Shein alimueleza Mwakilishi huyo kuwa kikao hicho kitasaidia kutoa mwelekeo kwa pande mbili hizo kutokana na fursa zilizopo sambamba na kuangalia ni uwekezaji wa aina gani utaanzishwa na kampuni hizo.