Vita ya Mo Salah na De Bruyne yatangazwa, Mchezaji Bora England

 

Chama cha Wachezaji wa kulipwa nchini England (PFA) kimetangaza majina ya wachezaji wanaowania tuzo ya mchezaji bora wa ligi kuu ya EPL msimu huu, ambapo orodha hiyo inaongozwa na nyota wawili Mohamed Salah na Kevin De Bruyne. 

Majina hayo mawili yanapewa nafasi kubwa ya kushinda tuzo hiyo mbele ya wachezaji wengine wanne waliotangazwa na PFA kwaajili ya tuzo hiyo ambayo msimu uliopita ilichukuliwa na kiungo wa Chelsea N'golo Kante.

 

Manchester City imeingiza wachezaji watatu katika orodha hiyo ambao mbali na De Bruyne ni Leroy Sane na David Silva huku mshambuliaji wa Tottenham Hotspurs Harry Kane akiingia kwenye orodha hiyo kwa msimu wa nne mfululizo.

Mchezaji mwingine anayekamilisha orodha ya wachezaji sita ni mlinda mlango wa Manchester United Mhispania David De Gea ambaye amekuwa kwenye kiwango bora katika misimu ya hivi karibuni.

Wachambuzi mbalimbali wa soka wanatoa nafasi kubwa kwa Kevin na Salah kutokana na namna walivyozisaidia timu zao. Kevin ametoa msaada mkubwa kwenye mabao mengi ya Man City huku Salah akiwa anaongoza orodha ya wafungaji EPL msimu huu akiwa na mabao 29.