Wadau wa Soka Micheweni Hamjaona Umuhimu WEMBE STARS....?

TIMU ya Soka ya WEMBE STARS inayoshiriki Ligi Daraja la Pili wilaya ya Micheweni inakabiliwa na Changamoto mbalimbali ikiwemo ukosefu wa fedha kwaajiri ya uendeshaji wa shughuli za timu hiyo.

Hayo yamebainishwa katika kikao cha mashabiki, wanachama na viongozi wa timu hiyo kilichokutana mapema wiki hii kwa ajiri ya kujadili maendeleo ya timu hiyo katika skuli ya Msingi Maziwang’ombe Wilaya ya Micheweni Mkoa wa Kaskazini Pemba.

Katika kikao hicho katibu wa timu hiyo, Ali Omar amesema kuwa wameamua kuitana ili kuwekeana mikakati ambayo itaisaidia timu hiyo kuendelea kufanya vizuri katika ligi ambayo wanakwenda kushiriki msimu ujao.

Baadhi ya wanachama walioshiriki kikao hicho wakichangia mada, wameuomba uongozi wa timu hiyo mbali na ukata wa fedha unaoikabili timu, iunde utaratibu wa kuchangishana michango kwa mashabiki na wapenzi wa timu hiyo ili kuiwezesha kusonga mbele zaidi.

 

Katika hatua nyingine kikao hicho kimeazimia kuwaomba viongozi mbalimbali waliomo katika wilaya ya Micheweni kujitokeza kujitolea kuichangia timu hiyo ili kuhakikisha timu inafanikiwa kufuzu kushiriki ligi kuu Zanzibar kwa upande wa Pemba.

Timu ya Wembe Stars yenye makao yake makuu katika kijiji cha Maziwang’ombe, ilianzishwa mnamo mwaka 1994 na kupewa jina la Wembe Stars kama mwakilishi Pekee katika Wilaya ya Micheweni Mkoa wa Kaskazini Pemba.