ZAECA Wafunga Ghala la Chakula Wete

MAMLAKA ya kuzuia Rushwa na Uhujumu wa Uchumi Zanzibar –ZAECA- Mkoa wa Kaskazini Pemba imefunga ghala la kuhifadhia chakula katika Bandari ya Wete ili kuendeleza zuio la kutotumika mafuta ya kula yaliyohifadhiwa ndani ya ghala hilo.

Mdhamini wa Mamlaka hiyo Mkoa wa Kaskazini Pemba Abubakar Mohammed Lunda amesema ZAECA imechukua uwamuzi huo baada ya kubaini kuwa mafuta hayo hayafai kwa matumizi ya binadamu .

Ameeleza kuwa mafuta hayo aina  ya HAYATI na TASTY TOM yalikamatwa yaliingiza kinyume na sheria ,  na kuzuiwa yasitumike ambapo ZAECA ililazimika kuchukua sampuli kupeleka kwenye maabara ambapo majibu yametolewa kwamba hayafai kwa matumizi .

Katika maelezo yake Abubakar amesema kuwa ghala hilo amelifunga na kwamba wakala akihitaji bidhaa atawasiliana na Mamlaka kwa ajili ya kufunguliwa . 

‘’Mamlaka imelazimika kuchukua uwamuzi wa kulifunga ghala hili ili kuzuia mafuta yaliyomo ndani yasiendelee kuuzwa kwani hayafai kwa matumizi ya binadamu ‘’ .

Aidha Abubakar ameeleza kwamba wamemuandikia barua mmiliki wa mafuta hayo Ali Shaib , na hatua za kisheria zinafuata ikiwa ni pamoja na kumfikisha mahakamani kujibu tuhuma za kuuza bidhaa ambazo haifai kuliwa .

Abubakar amewataka wananchi kuwa makini wanaponunua mafuta ya kula kwa kuangalia muda wake wa matumizi ili kuepuka kupata aradhi .

Wakala wa mfanyabiashara aliyeingiza mafuta hayo , amesema kuwa uwamuzi wa kuendelea kuyauza baada ya kupokea barua kutoka  Taasisi ya Viwango Zanzibar –ZBS- kwamba mafuta hayo yanafaa kwa matumizi .

Amesema kuwa awali alipokea barua inayomtaka kuzuia kuyauza mafuta hayo na alitii , lakini baada ya kupata idhini kutoka ZBS akaamua kuendelea kuyauza mafuta .