Ligi Kuu Pemba yafikia tamati

LIGI Kuu ya Zanzibar kanda ya Pemba ilifikia tamati juzi ambapo Opec ilifanikiwa kuilaza Wawi Star magoli 3-1 kwenye uwanja wa Gombani.

Ushindi huo uliiwezesha Opec kufikisha pointi 49 na kushika nafasi ya pili nyuma ya Mwenge yenye pointi 50.

Timu hizo zilianza mchezo kwa ushindani mkubwa huku kila upande ukikosa mabao ya wazi na kujikuta zikienda mapumziko zikiwa hazijafungana.

Lakini, kipindi cha pili kilianza kwa mshike mshike na Opec kuonekana kulisakama lango la wapinzani wao kama nyuki na kufanikiwa kupata goli la kwanza lililofungwa na Morris Rauri kwenye dakika ya 50.

Mshambuliaji, Khamis Sadik aliifungia Opec goli la pili kwenye dakika ya 64 kabla ya Wawi Star kufunga la kufutia kupitia kwa Mohamed Haji katika dakika ya 66.

Kila muda ulipokuwa ukiyoyoma huku mvua zikiendelea kunyesha,mshambuliaji Moris Raul kwa mara ya pili alizifumania nyavu za Wawi kwenye dakika ya 86 na kuandika bao la tatu.