Taasisi za Elimu zaonywa kuwepo kwa Vyuo visivyokidhi vigezo Zanzibar

TAASISI na Mamlaka zinazohusika na usimamizi wa vyuo vya elimu ya juu na mafunzo ya ufundi nchini zimetakiwa kuchukua hatua zinazostahiki wanapogundua uwepo wa taasisi zisizokidhi vigezo.

Akifungua mafunzo ya kuwajengea uwezo viongozi wa shirikisho la vyuo vikuu Zanzibar (ZAHLIFE) kuhusiana na usajili wa taasisi za elimu ya juu, mkuu wa mkoa wa mjini magharibi mhe; ayoub mohammed Mahmoud amesema kufanya hivyo kutasaidia kupatikana rasilimali watu yenye tija na kuondoa usumbufu kwa wanafuzi na wazazi wao.

Amesema Mamlaka ya mafunzo ya amali Zanzibar, Baraza la taifa la usimamizi wa taasisi za elimu ya juu (NECTA) na Wizara ya elimu na mafunzo ya amali kwa pamoja wanapaswa kusimamia upatikanaji wa watu walioelimika na wenye ujuzi utakaochochea maendeleo ya taifa.

Amesema katika utafiti uliofanywa na ZAHLIFE imegundulika uwepo wa vyuo ambavyo vinafanya kazi kinyume na matakwa ya sheria ya uanzishwaji wa vyuo vya elimu ya juu na mafunzo ya amali jambo linaloleta usumbufu kwa wanafunzi wanaomaliza katika vyuo hivyo wanapotaka kujiunga katika ngazi nyengine ya elimu.

Mkuu huyo wa mkoa ambae pia ni mwenyekiti wa bodi ya wadhamini ya ZAHLIFE alizishauri mamlaka hizo kukaa pamoja na kuviondoa vyuo hivyo katika mfumo wa elimu nchini ili kuwaokoa wanafunzi wanaosoma na hasara watakayoipata pindi watakaposhindwa kuendelea na mafunzo yao katika ngazi nyengine.

Aidha aliupongeza uongozi wa ZAHLIFE kwa kuamua kuandaa mafunzo hayo na kuwataka kuendelea kufanya kazi kwa mashirikiano na kutoa taarifa kwake na mamlaka nyengine pindi wanapogundua uwepo wa vyuo au taasisi za elimu ya juu na mafunzoo ya amali visivyokidhi vigezo.

Nae Mkuu wa kanda ya Zanzibar wa Baraza la usimamizi wa taasisi za elimu ya juu na mafunzo ya ufundi Tanzania (NACTE) Halima Mbilinyi amesema taasisi yake imekuwa ikifanya ukaguzi wa mara kwa mara kwa taasisi na vyuo vya elimu ya juu ili kuhakikisha taasisi hizo zinazingatia sheria zilizopo.

Amesema hadi kufikia mwezi aprili mwaka huu vyuo na taasisi 16 zimeshasajiliwa baada ya kukidhi vigezo na masharti, vyuo viwili vimefungiwa na vyengine 8 vilifutiwa usajili baada ya kushindwa kufikia vigezo vinavyohitajika.

Akitoa shukrani kwa niaba ya washiriki wa mafunzo hayo, Mwenyekiti wa ZAHLIFE Abdullatif Kadir Mussa aliwataka wanafunzi nchini kufanya utafiti kabla ya kujiunga na baadhi ya vyuo ili kujiridhisha kama vyuo hivyo vimesajili kozi wanazotaka kujifunza kwa lengo la kuepuka madhara katika siku za baadae.

Amesema licha ya kuwepo kwa vyuo vilivyosajiliwa, baadhi yao hutoa kozi ambazo hazikusajiliwa jambo ambalo ni kosa kisheria na kushauri kurejeshwa kwa  kwa mpango wa kurudia mitihani ili kuongeza sifa za kujiunga na vyuo kwa wanafunzi ambao hawajatimiza sifa za kujiunga na vyuo vya elimu ya juu.

Mafunzo hayo ya siku mbili yaliendeshwa na wataalamu mbali mbali kutoka Wizara ya elimu na mafunzo ya amali Zanzibar, Bodi ya mikopo ya elimu ya juu na Baraza la usimamizi wa vyuo na taasisi a elimu ya juu Tanzania ambapo pamoja na mambo mengine washiriki walijifunza namna mpya ya kuomba mikopo inayotolewa na bodi ya mikopo ya elimu ya juu kwa lengo la kwenda kuwasaidia wanafunzi wengine katika vyuo vyao.