Uharibifu katika Msitu wa Ngezi Wilaya ya Micheweni Ulivyoanza kuathiri Vijiji 12, Wananchi wataja Sababu zake

 

WAKAAZI wa Vijiji 12 vinavyozunguka Msitu wa  hifadhi ya Serikali wa Ngezi katika Wilaya ya Micheweni wamesema  vitendo vya baadhi ya wananchi kutumia fursa ya uwepo na msitu huo kuharibu mazingira kumeanza kupunguza neema  zinazopatikana na ndani ya hifadhi hiyo .

Baadhi ya wananchi wamekuwa wakitumia msitu huo kama maficho ya kufanyia uhalifu wa kutengeneza pombe haramu aina ya Gongo, na kusababisha kutoweka kwa baadhi miti ya matunda na viumbe hai.

Hali hiyo inaweza kusababisha umaskini kwa baadhi ya wananchi ambao wanategemea uwepo na viumbe hai pamoja na miti ya matunda matunda hayo kuendesha maisha yao.

Neema ambazo tayari zimeanza kutoweka ni pamoja na viumbe hai wanaopatikana kwenye maziwa yaliyomo ndani ya hifadhi wakiwemo  Kambare pamoja na miti ya matunda aina ya Mabungo.

Wakizungumza na REDIO JAMII MICHEWENI wametaja athari nyengine kuwa ni kupungua matunda aina ya mabungo ambayo ni maarufu kwa kinywaji kinachopendwa na wengi cha juisi .

Hamad Bakar, amesema kuwa Mabungo  ambayo  awali yalikuwa yanapatikana kwa wingi ndani ya hifadhi hiyo kwa sasa yameanza kuwa adimu kupatikana.

“Ukifika msimu wa mabungo vijana wengi hujiimarisha kiuchumi na maisha yao kuwa bora kutokana na matunda hayo kuchumwa kwa wingi na kuinufaisha jamii yote kisiwani Pemba  lakini kwa sasa hali imekuwa tofauti” alieleza.

Akizungumzia hali hiyo Afisa Mkuu wa Msitu huo Abdi Mzee amekiri kuwepo na baadhi ya wananchi wanautumia msitu kama maficho yaona kueleza  kuanza kutoweka kwa viumbe hai wakiwemo vyura na samaki aina ya kambare.

Abdi amesema kuwa licha ya vitendo hivyo kupungua siku hadi lakini tayari athari hizo zimeanza kujitokeza jambo ambalo pia limekuwa likiathiri sekta ya Utalii kwani watalii wengi wanaotembelea msitu hupenda kuangalia viumbe hai ndani ya maziwa pamoja na matunda aina ya mabungo.

“Viumbe hai wegi wanaopatikana kwenye maziwa ndani ya hifadhi , kutokana na wapikaji wa gongo kumwaga maji machafu yanayotokana na vitendo vya upikaji wa pombe haramu’’alifahamisha .

Aidha ameeleza kwamba mbali na kuanza kutowekwa kwa viumbe hao , piamajanga ya kuungua moto msitu huo yamekuwa yakitokea na kuchangia athari kimazingira .

Kupungua kwa matendo ya uharibifu ndani ya hifadhi hiyo , kimetokana na operesheni inayofanywa na Mkuu wa Wilaya ya Micheweni Salama Mbarouk Khatib ya kuwasaka na kuwakamata wananchi wanaoendesha vitendo hivyo kwenye hifadhi ya msitu wa Ngezi .