'Vitendo hivi Visipodhibitiwa Mapema Tujiandae Kukipoteza Kisiwa hiki'

 

KUSHAMIRI kwa vitendo vya ukataji wa miti ovyo vinavyofanywa na baadhi ya wananchi , vimeanza kutishia kutoweka kwa kisiwa kidogo cha Njao kilichopo Wilaya ya Wete Mkoa wa Kaskazini Pemba .

Hali hiyo inayoafanywa na baadhi ya wananchi  katika kisiwa hicho imetokana na kuwepo na biashara ya magogo, kilimo kisichozingatia hifadhi ya mazingira  pamoja na  vitendo vya uchomaji wa mkaa.

Mussa Juma Mohammed ameiambia REDIO JAMII MICHEWENI kuwa wakulima katika  kisiwa hicho  wameanza kupata athari ya kupungua mazao ya chakula na biashara na hivyo kusababisha njaa na umaskini.

Ameeleza kwamba iwapo vitendo hivyo havitadhibitiwa, baada aya miaka kumi ijayo, kisiwa hicho kitakuwa  jangwa na wananchi wanaokitegemea watakumbwa na hali ya umaskini ulikithiri.

“Shughuli za kibinadamu ambazo zimeshamiri katika kisiwa hichi, zimeanza kusababisha kupungua hali ya uzalishaji wa chakula pamoja na kukosa sehemu za malisho ya mifugo’’ alieleza.

Naye Khatib Kombo Khamis amesema awali ndani ya Kisiwa hicho hakukuwa na tabia ya wafugaji kufunga mifugo yao, walikuwa wanaiachilia kutokana na kuwepo sehemu kubwa ya malisho tofauti na sasa ambapo wafugaji wanaifunga kwa hofu ya kuharibu vipando vya wakulima.

Sheha wa Shehia hiyo Ali Abdalla amesema kuwa vitendo hivyo vina athari kimazingira na unachangia maji ya bahari kuvamia maeneo ya kilimo katika kisiwa hicho .

Akizuzngumzia hatua ambazo uongozi wa shehia umechukua, amesema kuwa ni pamoja na kufanya mikutano ya mara kwa mara na wananchi na kuwataka washirikiane na Serikali kuyahifadhi mazingira ya kisiwa hicho.

Mkuu wa Wilaya ya Wete Abeid Juma Ali ameutaka uongozi wa Shehia hiyo kuimarisha doria katika kisiwa hicho ili kudhibiti vitendo vya ukataji wa miti pamoja na uchimbaji wa mawe.

Amesema ili kudhibiti vitendo hivyo ni vyema uongozi wa shehia kuondoa muhali na kuhakikisha kwamba rasilimali katika kisiwa hicho zinabaki salama na zinaendelea kunufaisha jamii ya sasa na baadaye .

“Katika kufanikisha udhibiti wa vitendo hivyo , hakuna budi kuondoa rushwa muhali ili kufanya mazingira kurejea kwenye uhalisia wake’’ alisisitiza.

Kisiwa cha Njao ni moja visiwa vidogo vidogo katika Wilaya ya Wete ambacho umaarufu wake katika uzalishaji wa chakula umeanza kupungua , na kunahitajika hatua za makusudi kuweza kurejesha uhalisia  wa uoto wake .