Wafanya Biashara Soko la Konde waomba Mazungumzo na Serikali kuimarisha Biashara zao

UONGOZI wa Halmashauri ya Wilaya ya Micheweni umeshauriwa kuandaa Mazingira mazuri ya kuvihamisha vibanda vya Biashara katika mji wa Konde na kuvihamishia ndani ya soko la matunda na mboga mboga Konde.

Akizungumza kwa niaba ya  wafanyabiashara wa soko hilo, Khamis Ali Ngoma amesema uwepo na vibanda vya biashara nje ya soko hilo , kunaikosesha serikali mapato .

Amesema soko hilo ambalo limejengwa na Serikali na kugharimu mamilioni ya fedha, kwa sasa biashara ndani yake sio nzuri, huku akishauri gari la abiria kutoka Chake ziruhusiwe kushisha abira kwenye viwanja vya soko hilo.

Naibu Waziri wa Wizara ya Nchi, Ofisi ya Rais, Tawala za Mikoa, Serikali za Mitaa na Idara Maalumu za SMZ Mhe Shamata Shaame Khamis amewataka wafanyabiashara kuendelea kushirikiana na Serikali kwa kuhakikisha soko hilo linatumika na kuloeta tija.

Amesema ni vyema uongozi wa soko kukaa pamoja na wafanyabiashara kuzungumzia suala la kuvihamisha vibanda vidogo vidogo na kuwataka waingie ndani ya soko jambo ambalo litaondoa usumbusu wa ukusanyaji wa mapato.

Mkurugenzi wa Halmashauri ya Wilaya ya Micheweni Hamad Mbwana Shehe amesema wafanyabiashara wanaendelea kulitumia soko hilo kwa ajili ya kuuza biashara zao .