Maji Chumvi yazidi kuwaathiri Wakulima Pemba, Wasema wasipoangaliwa Njaa itawateketeza

JUMLA wa Eka Nane katika bonde la Tovuni lililoko Kiungoni zimeathirika na mabadiliko ya tabia ya Nchi yaliyosababisha maji ya Chumvi kuvamia bonde hilo  pamoja na wadudu waharibifu  wa mpunga  aina ya Hispa.

Hali hiyo imesababisha wakulima zaidi ya 50 kupoteza zaidi ya tani 12 za mpunga kwa msimu huu, jambo ambalo linatishia faamilia hizo kukumbwa na baa la njaa.

Wakulima wa bonde hilo wametaja sababu zilizosababisha hali hiyo ni kukosekana kwa tuta la kudumu kuweza kuhimili maji ya chumvi yasiingine ndani ya bonde la kilimo.

Katibu wa bonde hilo  Hamad Ali Khatib akizungumza na REDIO JAMII MICHEWENI amesema wakulima wa eneo hilo wamehamasika kuendeleza kilimo kwa kukubali kuchangia gharama za ujenzi wa tuta la kuzuia maji ya chumvi kuingia ndani ya bonde.

Amefahamisha kuwa juhudi za wakulima zimeshindwa kuzaa matunda kwani nguvu za maji ya bahari zimeweza kubomoa tuta ambalo limejengwa na wakulima  kwa njia ya kienyeji.

 Katibu Mkuu wa Wizara ya Kilimo, Maliasili, Mifugo na Uvuvi Bi Maryam Juma Abdalla amesema Serikali itafanya utafiti wa udongo ili kujua kiasi cha chumvi kilichopo kwenye udongo wa bode hilo.

 Amefahamisha kwamba , utafiti huo utaweza kutoa majibu sahihi ambayo yatatumiwa na wataalamu wa kilimo kuweza kuwasaidia wakulima wa bonde hilo.

Naibu Waziri wa Wizara ya Kilimo, Maliasili, Mifugo na Uvuvi Dr Makame Ali Ussi mbali na kuahidi kuimairisha kilimo cha umwagiliaji maji katika bonde hilo, pia amewasitiza wakaulima kuendelea kushirikiana na wataalamu wa sekta ya kilimo kuendeleza uzalishaji.

Bonde la Tovuni lenye ukubwa wa eka 85 na linajumla ya wakulima 281 ambalo baadhi ya maeneo yake yameathirika na maji ya chumvi na kusababisha wakulima kukosa sehemu za kilimo.