ZECO Pemba yawataka Masheha Micheweni kuwaelimisha wananchi wao kuilinda miundombinu ya Umeme

SHIRIKA la umeme  kisiwani Pemba limewataka masheha kuwaelimisha wananchi wao juu ya matumizi na sheria ya uungaji wa huduma hiyo ili kuepukana na matatizo yanayoweza kujitokeza hapo baadaye.

Akizungumza na masheha huko ukumbi wa ZANGOC Wilaya ya  Micheweni Afisa uhusiano wa Shirika hilo Kisiwani Pemba Amour Salim Massoud amesema kuna baadhi ya wananchi wanaitumia huduma hiyo kinyume na malengo  na  kusahau umuhimu katika maendeleo. 

Amour amesema umeme si anasa bali ni huduma muhimu katika kuendesha sekta mbalimbali za kijamii hivyo kila mmoja ana wajibu wa kuitumia huduma hiyo kwa uangalifu na kulinda miundo mbinu yake.

Mapema Afisa huduma wa ZECO Pemba Amour Khalid amewasihi masheha  kuzidi kuwaelimisha wananchi wao kwa kutowapa fedha watu wasioeleweka katika kuungiwa umeme jambo ambalo limekuwa likileta malalamiko kwa wateja kuwa shirika linawaibia.

Nao baadhi ya Masheha hao wamesema pamoja na kutowa elimu kwa wananchi wao lakini nao watendaji wa shirika la umeme wabadilike katika kutoa huduma kwani baadhi hudharau miito wanapopewa taarifa na wateja ya kuungua au kuharibika miundombinu na wengine kucheleweshewa kuungiwa umeme kwa zaidi ya miezi sita .