Asakwa na Polisi kwa tuhuma ya kumbaka Mtoto wa Miaka mitatu Pemba

 JESHI la Polisi Mkoa wa Kaskazini Pemba linamsaka kwa udi na uvumba mtuhumiwa anaedaiwa kumbaka mtoto wa kike mwenye umri wa miaka mitatu na kumsababishia maumivu sehemu zake za siri .

Tukio hilo limetokea jini 24 mwaka huu ,  huko Shehia ya  Bopwe Wilaya ya Wete Mkoa wa Kaskazini Pemba na mtuhumiwa kukimbia baada ya kutekeleza kitendo hicho cha kinyama

Akizungumza ofisini kwake Kamanda wa Polisi Mkoa Kaskazini Pemba Kamishna Msaidizi mwandamizi  Hassan Nassir Ali amesema jeshi la Polisi linafanya kila njia ili kuhakikisha mtuhumiwa anapatikana na kufikishwa mahakamani .

Amesema kwamba  tayari askari wa kitengo cha upelelezi wameanza kufanya uchunguzi wa kisayansi kumtafuta mtuhumiwa huyo na kuwataka wananchi kuwapa ushirikiano utakaofanikisha kukamatwa tuhumiwa huyo.

‘’Tumejipanga na tumeanza kufanya uchunguzi , cha msingi nawaomba sana wananchi washir8kiane na askari kwa kutoa taarifa ambazo zitafanikisha mtuhumiwa huyo kutiwa mikononi’’ alieleza .

Aidha Kamanda Nassir amewataka wananchi kujenga utamaduni wa kufuatilia mienendo ya watoto wao , jambo ambalo litasaidia udhibiti ongezeko la matendo ya ubakaji ambayo huwaathiri zaidi kiafya.

Kamanda Nassir amesema matendo ya udhalilishaji wa wanawake na watoto yanaweza kupatiwa fumbuzi na kukomeshwa iwapo kila mmoja atawajibika kulingana na nafasi aliyonayo.

Afisa Ustawi wa Jamii Wilaya ya Wete , Haroub Suleiman Hemed ameishauri jamii kshirikiana katika kuyapiga vita matendo ya udhalilshaji yakiwemo ya ubakaji wa wanawake na watoto .

Haroub amesema pamoja na elimu inayotolewa na taasisi za umma na binafsi lakini bado wapo baadhi ya wananchi wameshindwa kuipokea taaluma hiyo kwa mtizamo unaokubalika na hivyo kuwa ni kikwazo katika mapambano dhidi ya matendo  hayo.

‘’Hili si jukumu la mtu mmoja  au serikali pekee ,  bali ni la kima mmoja , hivyo ushirikiano wa wanajamii wote unahitajika ili kufanikisha kufikia lengo ‘’ alifahamisha.

Haroub amewaasa wanajamii kujiepusha na vitendo vya rushwa muhali bali wawe tayari kushiriki kutoa ushahidi katika vyombo vya sheria wanapohitajika , ili kuunga mkono juhudi za serikali za kuyatokomza matendo hayo.

Hivyo amepongeza uwamuzi wa Serikali wa kufuta dhamana kwa watuhumiwa na matendo ya ubakaji wa wanawake na watoto na kusema kwamba hatua hiyo itasaidia katika mapambano dhidi ya wahusika wa vitendo hivyo.