CYD: Wazazi tuwafunzeni maadili mema Vijana wetu kulinda Amani ya Nchi

JAMII kisiwani Pemba imetakiwa kukaa karibu na vijana ili kuwaelimisha mbinu za kueneza amani kwa kuepuka kujiingiza katika makundi maovu ya kiharifu yanayoweza kuleta athari katika jamii na Taifa kwa ujumla.

Rai hiyo imetolewa na Mratibu wa Mradi wa kuwaelimisha vijana juu ya umuhimu wa amani katika jamii kutoka taasisi ya Majadiliano kwa Vijana, (Center for Youth Dialogue –CYD), Moza Kawambwa Nzole, wakati akizungumza na vijana kisiwani hapa.

Amesema kuwa ili kijana aweze kukua katika misingi adilifu ndani ya familia, wazazi wanatakiwa kukaa karibu na vijana ili kuwawezesha kujiepusha na kujiingiza katika makundi maovu.

Mratibu wa Mradi kutoka taasisi ya Majadiliano kwa Vijana, (Center for Youth Dialogue –CYD), Moza Kawambwa Nzole, akiwasilisha mada, katika Viwanja vya Polisi Madungu, Chake chake Pemba.

“Malezi ya watoto yanahusisha baba na mama, kwahiyo wakati mwingine wazazi wanaweza kuwa chanzo cha vijana kupotoka pale malezi ya pamoja yanapokosekana katika familia,” alisema Moza.

Akizungumza katika Mafunzo hayo, Mratibu wa Taasisi ya Jukwaa la Vijana Zanzibar –ZYF-, Almas Mohamed, alisema ni jukumu la kila mwanajamii kuhakikisha anaeneza amani ili kujiepusha na vitendo vinavyoweza kuleta vurugu.

Mratibu wa Taasisi ya Jukwaa la Vijana Zanzibar, (Zanzibar Youth Forum)–ZYF-, Almas Mohamed, akizungumza na washiriki wa Mafunzo yaliyofanyika katika Uwanja wa Polisi Madungu, Chake chake Pemba.

“Kuna njia mbalimbali sahihi za kudai haki ambazo tukizifuata basi tunaweza kumaliza tofauti zetu na kuendelea kuishi kwa amani na upendo katika jamii zetu,” alisema Almas.

Mmoja wa washiriki wa Mafunzo akichangia Mada.

Kwa upande wake Hemed Khamis Khatibu mkaazi wa Wilaya ya Wete Mkoa wa Kaskazini Pemba, amesema umefika wakati ambapo wazazi wanatakiwa kulea familia zao kulingana na tamaduni walizokuwa nazo.

“Silka tulizotokanazo ni tofauti na sasa, saizi mtoto anaweza kukuta baba unamkoba na chakula unaleta kwao lakini mtoto yule anakuangalia na pengine mzazi hasemi chochote,” alisema.

Baadhi ya washiriki wa Mafunzo hayo wakifuatilia mafunzo.

Nae Bi Rabia Omar Saleh, alisema kuwa wazazi wana wajibu wa kutambua marafiki wa watoto wao ikiwa ni pamoja na kuwafahamisha aina ya marafiki wanaotakiwa kuambatana nao ili wasiweze kujiingiza katika makundi maovu.

“Mtoto ni kama Kitabu, hivyo unavyomtunza ndivyo anavyokua mwema katika jamii, hivyo wazazi tujitahidi kuwa karibu na watoto wetu kila wakati,” alisema Rabia.

Mradi huo unatekelezwa kwa kufadhiliwa na Shirika la The Foundation for Civil Society.

Washiriki wa Mafunzo katika Picha ya pamoja tayari kwa mchezo wa kirafiki baada ya mafunzo kama ishara ya upendo.

PICHA ZOTE NA: GASPARY CHARLES - Micheweni Radio, Pemba.