Tani Mbili za Bidhaa Feki zateketezwa Pemba, Wizara yatoa Onyo kali kwa Wafanya Biashara

JUMLA ya Tani mbili za bidhaa zilizomaliza muda wa matumizi zenye thamani ya Shilingi Milioni Tano, zimeteketezwa na Kitengo cha kusimamia mwenendo wa Biashara na kumlinda mlaji katika Eneo la Mikindani, Wilaya ya Wete mkoa wa Kaskazini Pemba.

Akizungumza wakati wa zoezi hilo, Afisa Biashara, Wizara ya Biashara na Viwanda Pemba, Bi Mgeni Khatib Yahya, amesema huo ni mwendelezo wa juhudi za Wizara kupitia kitengo hicho wa kuhakikisha wanadhibiti uuzaji wa bidhaa feki madukani.

Afisa Biashara, Wizara ya Biashara na Viwanda Pemba, Bi Mgeni Khatib Yahya, akionesha namna ambavyo Wafanya Biashara wanazifuta namba za kuisha muda wa matumizi na kubandika feki.

Afisa huyo amesema kuwa bidhaa hizo zilizoteketezwa zilikusanywa kutoka kwenye maduka ya maeneo tofauti ya kisiwa cha Pemba baada ya kufanyika msako wa kubaini uwepo wa bidhaa hizo madukani.

Gari lililobeba Bidhaa hizo likizimwaga katika eneo la kutupia taka la Mikindani, Wilaya ya Wete Mkoa wa Kaskazini Pemba tayari kwa kuteketezwa.

Bi Mgeni amebainisha kwamba kumekuwepo na tabia za baadhi ya wafanya biashara kufuta muda uliowekwa wa kuisha matumizi kwenye bidhaa na kubandika chapa nyingine feki ili ziendelee kuwa sokoni.

“baada ya kufanya msako kwenye maduka, tumebaini kuwa kuna wafanyabishara wanafuta namba za muda wa kuisha matumizi kwenye bidhaa na kubandika namba nyingine za bandia.”

Baadhi ya Bidhaa zilizoteketezwa

Katika hatua nyingine afisa huyo amewataka wananchi kuwa makini wanaponunua bidhaa ili kuepuka kununua bidhaa zisizokidhi viwango ambazo zinaweza kuhatarisha maisha yao.

“Nitoe wito kwa jamii, wanapohitaji kununua bidhaa yoyote madukani wahakikishe wanaziangalia kwa umakini ili kuondokana na kununua bidhaa zilizomaliza muda wake wa matumizi ambazo ni hatari kwa afya zao.”

Ameongeza kwamba Wizara, kupitia idara ya Biashara itaendelea kuwachukulia hatua wafanyabiashara wanaokiuka sheria za biashara kwa kuuza bidhaa zisizositahili.

Baadhi ya Maafisa kutoka Kitengo cha kusimamia mwenendo wa Biashara na kumlinda mlaji, idara ya Biashara Zanzibar wakishiriki zoezi la uteketezaji wa Bidhaa hizo.

Baadhi ya wananchi wamepongeza hatua hiyo ya Wizara ya Biashara kufanya ukaguzi wa bidhaa feki kwani wao ndio waathirika wakubwa wa suala hilo.

Akizungumza na mwandishi wa habari hizi mwananchi, Juma Omar Alawi amesema maamuzi ya kitengo cha kusimamia mwenendo wa biashara na kumulinda mlaji ya kuteketeza bidhaa hizo yamekuja muda mwafaka kutokana na kuongezeka kwa bidhaa hizo madukani.

Afisa Biashara, Wizara ya Biashara na Viwanda Pemba, Bi Mgeni Khatib Yahya, akionesha moja ya mifuko inayotumiwa na wafanya biashara kuuzia Sukari iliyomalizika muda wake wakati wa zoezi hilo. (PICHA ZOTE NA GASPARY CHARLES-PEMBA)

“Naipongeza sana Serikali kupitia Wizara ya biashara na Viwanda kwa kutekeleza zoezi hilo kwa vitendo kwani bidhaa hizi zinatuathiri zaidi sisi wananchi wa kawaida.” Alisema Alawi.

Zoezi la ukaguzi na uteketezaji wa bidhaa feki kisiwani Pemba ni mwendelezo wa juhudi za Wizara ya Biashara na Viwanda wa kusimamia na kutekeleza azima ya serikali ya Mapinduzi ya Zanzibar ya kuhakikisha inamlinda mtumiaji dhidi ya matumizi ya bidhaa feki.

MATUKIO ZAIDI

 

  

(PICHA ZOTE NA GASPARY CHARLES-PEMBA)