ZYF Yawafunza Vijana Micheweni mbinu za upangaji malengo

Almas Mohamed Ali Mratibu wa mradi akitoa mada

 VIJANA wajasiriamali katika Wilaya ya Micheweni wametakiwa kujenga uthubutu, msukumo na nia ya kufanikiwa kupitia malengo yao ili kupunguza hisia hasi ambazo ni kikwazo cha maendeleo.

Baadhi ya washiriki wakifuatilia mafunzo hayo

Ushauri huo umetolewa katika mafunzo kwa vijana wa Willaya ya Micheweni na mratibu wa mradi wa kuwajengea uwezo vijana wa kupanga malengo kwa ajili ya maendeleo (Setting myself for Success Program), Almas  Mohamed Ali kupitia taasisi ya Vijana Zanzibar (Zanzibar Youth Forum).

Amesema pamoja na changamoto zinazowakabili vijana, lakini wanapaswa kuwa wajasiri kwa kutokimbia changamoto bali watumie ubunifu wao kuzigeuza kuwa fursa.

Baadhi ya washiriki wakifuatilia mafunzo hayo

Hata hivyo amewataka vijana kujitathimini pamoja na  kujipenda na kufurahia matokeo ya kazi zao ikiwa ni sambamba na kukaa karibu na watu waliofanikiwa.

“Vijana wanapaswa kujenga ujasiri wa kutokimbia changamoto pamoja na kuwa karibu zaidi na waliofanikiwa ili waweze kuambukizwa njia za mafanikio”alisisitiza.

Khairat Hamad Salim mmoja wa washiriki kutoka shehia ya Kinowe, amesema bado fursa na rasilimali zilizopo hazijatumika ipasavyo kuwaendeleza vijana, kutokana  na mawazo mgando kwa baadhi yao kutegemea ajira kutoka serikalini.

Mmoja wa washiriki Abdalla akichangia katia mafunzo hayo

Mjumbe wa baraza la Vijana Wilaya hiyo Abdalla Khamis Shaame amesema kupitia mabaraza ya vijana, vijana wamekuwa wakishajihishwa kuwa wajasiriamali lakini changamoto kubwa ni ukosefu wa elimu ya ujasiriamali.

“Ujio wa mafunzo haya yatatusaidia sana katika uendelezaji wa shughuli zetu kwani vijana wengi kutokana na kukosa elimu ya ujasiriamali wamekuwa wakikata tama mapema pale wanapokumbana na changamoto katika kazi zao,” alisema.

Mafunzo hayo ya siku Tatu yaliyoandaliwa na taasisi ya Jukwaa la Vijana Zanzibar (Zanzibar Youth Forum ZYF) ya kuwajengea uwezo Vijana wa kupanga malengo kwaajili ya maendeleo yao kupitia ufadhili wa taasisi ya The foundation for Civil Society, yamewashirikisha vijana zaidi ya 20 kutoka Wilaya ya Micheweni Mkoa wa Kaskazini Pemba.

PICHA NA GASPARY CHARLES- MICHEWENI FM