DC Wete: Mradi wa VIUNGO umewekeza nguvu kwenye Ujenzi wa Uchumi Endelevu kwa Wakulima Zanzibar

 

Mkuu wa Wilaya ya Wete, Dkt. Hamad Omar Bakar.

MKUU wa Wilaya ya Wete, Dkt. Hamad Omar Bakar amesema mbinu za utekelezaji mradi wa VIUNGO Zanzibar kuwaendeleza wakulima unajenga misingi imara itakayowezesha uchumi endelevu kwa wakulima Zanzibar kupitia kilimo hicho.

Amesema kuweka mazingira ya uendelevu wa uzalishaji hata baada ya mradi kumaliza muda wake ni hatua muhimu ambayo miradi mingi inashindwa kutekeleza na kupelekea kukosa matokeo chanya kwa walengwa.

Mkuu huyo wa wilaya ametoa kauli hiyo katika kikao cha kamati tendaji ya Wilaya za Micheweni na Wete Mkoa wa Kaskazini Pemba na maafisa wa mradi huo cha kujadili changamoto zinazowakabili wakulima wa mazao ya Viungo, mboga na matunda katika wilaya hiyo ili kuzitafutia ufumbuzi kwenye ngazi husika.

Dkt. Hamad ambaye pia ni kaimu mkuu wa Wilaya ya Micheweni amepongeza watekelezaji wa mradi huo People's Development Forum (PDF), Chama Cha Waandishi wa Habari Wanawake Tanzania, Zanzibar (TAMWA-ZNZ) na Community Forests Pemba unaofadhiliwa na Umoja wa Ulaya (EU) kupitia mpango wa AGRI-CONNECT Tanzania kwa hatua waliyoipiga kuwaendeleza wakulima wa mazao hayo ili kuwaondoa katika wimbi la umasikini.

Ameeleza ikiwa miradi yote inayotekelezwa kwenye jamii itakuwa na mbinu bora za kuwezesha uendelevu wa shughuli itasaidia kukuza ustawi wa Jamii na kuondoa changamoto zinazowakabili wananchi katika sekta mbalimbali. 

"Niwapongeze sana katika hili na niwaombe tuendelee kuwawezesha wananchi ili kujenga uchumi endelevu ambao utaongeza ajira na kutatua changamoto za kijamii kama vile afya," alieleza.

Katika hatua nyingine alieleza kuwa uwepo wa fursa ya mradi huo kwa wananchi Zanzibar unaisaidia serikali kufikia malengo yake ya kukuza uchumi wa wananchi na kuongeza ajira.

Alieleza, "tunafahamu shughuli za kilimo ni sehemu ya ajira kwa wananchi, hivyo nikupongezeni sana kwani kupitia mradi huu wananchi wengi hasa vijana wanapata ajira na kujiendesha kiuchumi jambo ambalo linairahisishia serikali ya Mapinduzi ya Zanzibar kufikia lengo la kuongeza ajira kwa wananchi wake kupitia kilimo." 

Said Hemed Shaame, afisa kilimo wilaya alisema changamoto kubwa ambayo bado inawakabili wakulima ni kukosa miundombinu rafiki inayoweza kuwahakikishia uendelevu wa uzalishaji wa mazao hayo kwa wingi ili kukidhi mahitaji ya soko.

Nae Bizume Haji Zume, afisa usitawi wa jamii wilaya hiyo alieleza bado kuna kikwazo cha ukosefu wa taaluma ya uhifadhi na na uchakataji wa mazao kwa wazalishaji na kushauri kuongezwa nguvu katika utoaji wa taaluma hiyo waweze kuzalisha kwa kuzingatia viwango na ubora unaohitajika sokoni.

Mapema afisa uwezeshaji kiuchumi wa mradi huo, Nairat Abdalla alisema mradi unatumia kamati za Wilaya kama chombo na jukwaa muhimu la kufuatilia changamoto zilizopo kwa wakulima na kuzitafutia utatuzi wa pamoja kwa ngazi husika.

Alieleza kupitia kamati hizo ambazo zinajumuisha maafisa na wataalam kutoka idara mbalimbali ngazi ya wilaya, zinawawezesha wakulima kuwasilisha changamoto zao na kuwezesha ufikiaji wa ongezeko la mnyororo wa thamani kwenye mazao.

Kikao hicho cha kamati tendaji ya mradi ngazi ya wilaya kimejumuisha maafisa kutoka idara mbalimbali za wilaya wakiongozwa na Katibu tawala, afisa usitawi, afisa Mipango, afisa kilimo, Mwenyekiti wa masheha, afisa biashara, afisa ushirika, afisa maji pamoja na afisa sera wilaya. 

Mradi wa Viungo unatekelezwa kwa lengo la kuongeza mnyororo wa thamani ya mazao ya mboga, matunda na Viungo kwa kuongeza thamani na uzalishaji mwingi wa mazao bora kwa lengo la kupata masoko na kukuza uchumi jumuishi Zanzibar.