ELIMU INAHITAJIKA KUTOLEWA KWA WAFUGAJI WA MBWA KISIWANI PEMBA

Pemba.

IDARA ya Maendeleo ya Mifugo Kisiwani Pemba imesema uwepo wa mbwa wasiokuwa na wenyewe , wanachangia kuwepo na ugonjwa wa kichaa cha mbwa kwa baadhi ya maeneo ya kisiwani hicho.

 

Afisa Mkuu wa Idara hiyo Asha Zahran Mohammed amesema wafugaji wa mbwa wa  Wilaya ya Micheweni na Chake Chake bado wanahitaji kuelimishwa zaidi ili waweze kujitokeza na kuwapeleka  mbwa wao kupata chanjo.

Amesema kuwa asilimia kubwa ya mbwa wanaofugwa Idara imewapatia chanjo , lakini kinachoenekana kuwa ni kikwazo na uwepo wa idadi kubwa  ya mbwa waliokuwa na wenyewe .

Akizungumza na blog hii  Asha amesema mbwa ambao hawana wenyewe hususani katika Shehia ya Kiuyu Mbuyuni kuna idadi kubwa ya mbwa wasiofugwa , ambao wananchi hawawezi kuwadhibiti.

Amefahamisha kwamba hata wakati za zoezi la kuchanja mbwa lililofanyika mwezi septemba mwaka jana , hakukuwa na mwitikio mzuri wa wafugaji wa mbwa wa shehia hiyo jambo  ambalo linapelekea shehia hiyo kuendelea kuripotiwa kesi za watu kung’atwa na mbwa.

“Wilaya ya Micheweni hususani Shehia ya Kiuyu Mbuyuni bado kesi  za watu kungatwa na mbwa zinaedelea kuripotiwa , kwani hata wakati wa chanjo iliyofanyika mwaka jana hakukuwa na mwitikio mzuri wa wafugaji wa mbwa kuwapeleka kupata chanjo ”alieleza.

Mkuu wa Mkoa wa Kaskazini Pemba Omar Khamis Othman amewataka  wananchi wa Wilaya ya Micheweni kutambua kwamba kichaa cha mbwa ni hatari na ni balaa ambayo ikitokea haimpati mtu mmoja .

Amesema  ni vyema wafugaji wa mbwa kushirikiana na wataalamu wakati wa zoezi la kuwachanja mbwa ili kuwakinga kupata ugonjwa wa kichaa ambao ni hatari pia kwa maisha ya binadamu .

“Ni vyema wananchi wa Wilaya ya Micheweni kutambua kwamba kichaa cha mbwa ni ugonjwa hatari na ambao unaweza kumpata mfugaji na asiye kuwa mfugaji , hivyo ni vyema wananchi wanaofuga mbwa kuhakikisha mbwa wao wanawapeleka kupata chanjo ”alisisitiza .

Aidha amewazitaka taasisi zinazoendesja zoezi la kuwachanja mbwa kutoa maelekezo kwa Serikali ya Mkoa sehemu ambazo wanapatikana mbwa wasiofugwa ili waweze kuangamizwa .

Idara ya Maendeleo ya mifugo Pemba inatarajia kufanya kampeni ya kuchanja mbwa wote ili kuwakinga na ugonjwa wa kichaa cha mbwa mwezi disemba mwaka huu , ambapo maandalizi ya zoezi hilo yamekamilika .