MAMLAKA YA MAJI WILAYA YA ICHEWENI YAWATAKA WANANCHI KUTUNZA NA KUENZI VYANZO VYA MAJI

PEMBA

Mamlaka ya maji wilaya ya micheweni imewataka wananchi wanaonufaika na huduma ya maji safi na salama kuyatunza na kuyaenzi  huku ikiahidi kuwapatia maji safi na salama.

Kauli hiyo imetolewa na Afisa wa baishara wa mamlaka ya maji  wilaya ya Micheweni Yussuf Ali Faki huko ofisini kwake kilindini mapofu katika shehia ya Mapofu Wilaya ya Micheweni Mkoa wa Kaskazini Pemba.

Amesema kuwa Mamlaka ya maji Wilaya ya Micheweni ipo mbioni kuondosha usumbufu wa mgao wa maji  kwa lengo la kuondoa kero zinazowakabili  baadhi ya wananchi katika vijiji tofauti.

Amevitaja vijiji hivyo kuwa ni pamoja na Kiuyu Mbuyuni,  Mjini Wingwi,  Kwale, Maziwa Ngo,ombe, Micheweni mjini pamoja na Chamboni.  Huku akisema kuwa tatizo hilo linasababishwa na uchache wa vianzio vya maji.

Aidha amesema kuwa tatizo la vianzio vya maji na uchakavu wa mitandao ya maji linasumbua, huku akisema kuwa mamlaka ya maji iko mbioni kulipatia ufumbuzi tatizo hilo kwa kuongeza visima vya maji, jambo ambalo litapelekea kuondoka kwa kadhia hiyo.

Ameongeza kuwa  baadhi ya wakati mwengine mgao wa maji  husababishwa na upasukaji wa mabomba  ya kusambazia maji.

Wakati huohuo amewataka wananchi  kulipia maji kwa hiari na kwa wakati hususan wenye kuingiziwa mifereji majumbani mwao ili kuepusha usumbufu  unaoweza kujitokeza ikiwa ni pamoja na kukatiwa huduma hiyo.

Sambamba na hayo, amesema amefurahishwa kutokana na kuongezeka idadi kubwa ya 80%  ya watu wanao nufaika na maji safi na salama, Hali ambayo inawafanya kuongeza juhudi na kuboresha  huduma hiyo mijini  na vijijini.