SERIKALI YAJENGA SOKO JIPYA LA TIBIRINZI ILI WAFANYABIASHARA WAWEZE KUUDHA BIDHAA ZAO.

Zanzibar                                                                 

RAIS wa Zanzibar na Mwenyekiti wa Baraza la Mapinduzi, Dk. Ali Mohamed Shein, amesema kuwa lengo la Serikali ya Mapinduzi ya Zanzibar kujenga soko jipya la Tibirinzi ni kwa ajili ya wafanyabiashara kuuza bidhaa zao ili wananchi wapate huduma wanazozihitajia bila ya kuingiza itikadi za kisiasa wala jinsia sokoni hapo.

Dk. Shein amesisitiza kuwa jengo hilo jipya la soko lisijegeuzwa sehemu ya kufanyia siasa na badala yake lifanye kazi iliokusudiwa kwani kwa kipindi kirefu wafanyabiashara wa soko hilo walikosa eneo la uhakika la kufanyia biashara.

Aliyasema hayo mara baada ya kuweka jiwe la Msingi la ujenzi wa soko jipya la Tibirinzi Chake Chake Pemba ambalo limefikia asilimia 80 za ujenzi wake na linatarajiwa ujenzi wake kukamilika mwishoni mwa mwezi wa Septemba mwaka huu.

Aliwataka wafanyabiashara wa soko hilo wakati litakapoanza kazi wasigombane na kuwaeleza wanaChake Chake kuwa soko hilo ni la kiwago na la pekee Zanzibar nzima.

Dk.Shein alitumia fursa hiyo kuwapongeza wafanyabiashara waliotakiwa kufanyabiashara zao katika eneo hilo kwa uvumilivu wao baada ya ufinyu wa nafasi kujitokeza katika soko lao la mwanzo ambapo mazingira yake hayakuwa mazuri wakati walipohamia na hatimae stahama yao imewapelekea kupata soko jipya la kisasa.

Alieleza kuwa Serikali ya Mapinduzi ya Zanzibar imechukua mkopo kwenye benki ya Maendeleo ya Afrika (ADB), kwa ajili ya kujenga masoko hayo kwani Serikali imeamua kuwasaidia wananchi wake sambamba na kutekeleza ahadi yake iliyoahidi katika Ilani ya Uchaguzi ya CCM ya mwaka 2015-2020 ya kujenga soko hilo.

Alieleza kuwa kutokana na mapato yanayokusanywa na Serikali ndio sababu moja wapo iliyopelekea Serikali ya Mapinduzi ya Zanzibar kuweza kukopeshwa na Benki kadhaa duniani kwani inakopesheka.

Aidha, ameeleza azma ya Serikali ya Mapinduzi ya Zanzibar kuijenga upya barabara ya kutoka Chake kupitia Ziwani hadi Wete na ile ya kutoka Chake Chake hadi Wete sambamba na kuitia lami hivi karibuni barabara ya Ole-Pujini hadi Kengeja.

Alisisitiza kuwa lengo ni kuibadilisha Zanzibar na katika kipindi cha miaka mitatu katika uongozi wake yatafanywa yale yote yalioahidiwa na yale yasioahidiwa kwa azma ile ile ya kuwapelekea maendeleo wananchi wote wa Zanzibar.

Nae Waziri wa Nchi Ofisi ya Rais Tawala za Mikoa, Serikali za Mitaa na Vikosi Maalum vya SMZ Haji Omar Kheir alisema kuwa Serikali ya Awamu ya Saba imedhamiria kuwasaidia wananchi wake katika kujikwamua na umasikini wa kipato.

Pia, alieleza azma ya Serikali ya Mapinduzi ya Zanzibar baada ya kuijenga barabara inayopita mbele ya soko hilo pia, hivi karibuni katika Bajeti yake ya mwaka huu itaijenga barabara kutoka Msingini kuelekea Miembeni.

Mkuu wa Mkoa wa Kusini Pemba, Mwanajuma Majid Abdalla alitoa pongezi kwa Dk. Shein kwa kupata maendeleo makubwa katika Mkoa huo na kutumia fursa hiyo kueleza historia ya soko hilo jipya hadi kupewa jina la soko la Qatar jina ambalo Dk. Shein alisema si busara kuitwa soko hilo na liitwe jina lake la soko la Tibirinzi.

Mratibu kutoka Wizara ya Kilimo, Maliasili, Mifugo na Uvuvi na kupitia Programu ya Miundombinu ya Masoko, Uongezaji Thamani na Huduma za Kifedha Vijijini (MIVARP) alieleza kuwa ujenzi wa soko hilo utagharimu TZS milioni 972.2.

Mratibu huyo alisema kuwa jumla ya vibaraza 76 vya wafanyabiashara vimejengwa katika soko hilo sambamba na kuwepo chumba maalum cha barafu pamoja na mtambo maalum wa kutengeneza vinoo vya barafu 125kg kwa saa sawa na tani 6 za barafu ambamo mtawekwa samaki, mbogamboga, nyama na matunda mengine.

Kwa mujibu wa Mratibu huyo katika soko hilo kutakuwa na umeme wa uhakika pamoja na jenereta la hakiba lenye KVA 20.

Mapema Mkandarasi wa Kampuni ya Ujenzi ya ZECCON Ali Mbarouk inayojenga soko hilo alieleza kuwa ujenzi wa soko hilo lenye ghorofa moja ni soko la pekee hapa Zanzibar ambalo litakuwa na mtambo na chumba maalum cha kutengenezea barafu.