WANAFUNZI WATAKIWA KUITUMIA MAKTABA KWA AJILI YA KUJIFUNDISHA

PEMBA

WANAFUNZI Kisiwani Pemba, wametakiwa kuitumia maktba ya Kituo cha Huduma za Sheria Zanzibar ZLSC, iliopo Chake chake, ili waweze kufanikiwa katika masomo yao na kuongeza taaluma ya masuala mbalimbali yanayohusiana na sheria.

Akizungumza na wanafunzi wa skuli ya sekondari ya Fidel castro wakati wa maonyesho ya maktaba ya Kituo cha Huduma za sheria, Afisa Mipango wa kituo hicho  tawi la  Pemba Siti Habibu Mohamed, alisema wanafunzi wanapoitumia maktaba hupata fursa ya kujifunza mambo mengi zaidi, kuliko vitabu vya wanafunzi (kiada).

Alisema kituo hicho, kimeanzisha maktaba hio kwa lengo la kuwasaidia wananafunzi na wananchi wengine kupata taaluma kupitia vitabu mbalimbali, vikiwemo vya Uraia(civics), General studies, Historia, Kiengereza, Sheria na Katiba.

“Maktaba ya Kituo cha huduma za sheria ipo kwa ajili yenu, muje mujisomee vitabu, bure bila ya malipo yoyote yale”,alisema.

Akifahamisha umuhimu wa Maktaba kwa wanafunzi, alisema wanapata elimu ya ziada, ambayo inaweza kukosekana katika vitabu vyao vya kujifunzia skulini, hivyo ni vyema wakaanza kuitumia maktaba hiyo, ili kuweza kufanikiwa katika masomo yao.

Alisema elimu ya ziada, inayopatikana kupitia maktaba inamuwezesha mwanafunzi, kukabiliana na changamoto mbalimbali, zinazowakabili ikiwemo uhaba wa vitabu rejea na uhaba wa wataalamu, wanaohusiana na mada zinazohusiana na sheria.

Mapema akifunguwa maonyesho hayo, mwalimu Omar Juma Suleiman aliwaasa wanafunzi hao, kujenga utamaduni wa kusoma vitabu mbali mbali, kwa lengo la kupata elimu ya ziada na kuweza kukabiliana vizuri na mitihani yao.

Alisema kujisomea vitabu vingi kunamsaidia mwanafunzi kukukuwa kiakili zaidi, na kuwa na maarifa makubwa hivyo kumrahisishia kujibu maswali vizuri na kupata ufaulu mzuri.

“Wanafunzi huu ni wakati wenu wa kujishughulisha na masomo zaidi kwa lengo la kujitayarishia maisha yenu ya badae, kwani hujuwi utakuwa nani na utakuwa wapi, hivyo unahitaji elimu ya ziada kuweza kuja kukabiliana na mazingira yoyote utakayokuwa nayo hapo baadae.

Akitowa maelezo kwa niaba ya wanafunzi wenzake, baada ya kusoma kitabu kinachohusiana na mada ya rushwa  mwanafunzi wa kidato cha nne, Sharifa Jongo Juma alisema amepata elimu kubwa inayohusiana na rushwa, jambo ambalo litampa uwezo wa kujibu, maswali yanayohusiana na mada hiyo.

Hivyo alikiomba kituo cha huduma  za sheria kuwapatia maarifa ya ziada yanayohusiana na mada ya rushwa, kwani mbali ya kuwasaidia kwa kukabiliana na mitihani yao, lakini pia itawafanya kua raia wema katika nchi yao.

Nae mwanafunzi wa Said Salim Said wa kidato cha sita alifurahishwa na elimu waliyoipata, na kuahidi kukitumia kituo hicho, kwa lengo la kupata taaluma mbalimbali na kuongeza maarifa zaidi.

Tayari Kituo cha Huduma za Sheria Zanzibar ZLSC tawi la Pemba katika mpango wake wa kuwafuata wanafunzi kuwahamasisha kupenda vitabu, wamekamilisha wilaya zote nne za Pemba, kwa kuzitembela skuli za Miti ulaya, Tumbe, Mauwani na Fidel castro ambapo wanafunzi zaidi ya 350 wamefaidika.