SERIKALI YA MKOA YAAHIDI KUWACHUKULIA HATUA WANAOSAFIRISHA KARAFUU BILA KUFATA TARATIBU ZA KISHERIA

PEMBA .

Mkuu wa mkoa wa kaskazini pemba Mhe Omar Khamis Othman  amesema hakuna mwananchi ambaye  atasalimika iwapo atakwenda kinyume na sheria kwa kusafirisha  karafuu kutoka  shehia moja kwenda nyengine bila ya kuwa na kibali.

Amesema kwa mujibu wa sheria ya karafuu ni kosa kusafirisha karafuu kutoka shehia moja kwenda nyengine  bila ya kuwa na kibali ambacho kinatambulika kisheria na ambacho kitatolewa na sheha.

Mkuu huyo wa mkoa ameyasema hayo baada ya vyombo vya ulinzi kufanikiwa kumkamata kijana  Mbarouk Salim Bakar ambaye alikuwa anasafirisha karafuu kutoka wilaya ya wete kwenda chake chake bila ya kuwa na kibali.

Mapema mkuu wa wilaya ya wete Rashid Hadid Rashid amesema kijana huyo amekamatwa baada ya kukaidi agizo la kukata kibali kutoka kwa sheha ambaye alimtaka afanye hivyo ili kuiwezesha serikali kudhibiti upotevu wa karafuu.

Naye kamanda  wa polisi mkoa  wa kaskazini pemba kamishna msaidizi Haji Khamis Haji amesema wamejipanga kuanza na kijana huyo kwani amefanya kosa kwa mujibu wa sheria ya karafuu.

Katika utetezi wake kijana huyo amesema alikuwa amepanga kukata cheti shehia nyengine kwani sheha wa shehia ya piki amekuwa akimlazimisha kuuza karafuu kwenye vituo vya zstc wilaya  hiyo na sio wilaya nyengine.