CCM ZANZIBAR YAWATAKA WATUMISHI WAKE KUBUNI MIKAKATI ENDELEVU ITAKAYOLETA MABADILIKO CHANYA YA KIMAENDELEO NDANI YA CHAMA

CHAMA Cha Mapinduzi (CCM) Zanzibar kimewataka watumishi wake kubuni mikakati   endelevu itakayoleta mabadiliko chanya ya kimaendeleo ndani ya Chama katika nyanja za kiuchumi , kijamii na kisiasa.

Wito huo umetolewa na Naibu Katibu Mkuu wa CCM Zanzibar , Dk. Abdulla Juma Mabodi wakati akifunga mafunzo elekezi ya siku moja kwa watendaji wa Afisi Kuu CCM Zanzibar, yaliyofanyika Kisiwandui Unguja.

Amesema Watendaji ndio nyenzo muhimu ya kuleta maendeleo ndani na nje ya Chama hicho  ili kiendelee kuwa kinara wa Demokrasia iliyotukuka na Sera zenye manufaa kwa wananchi wote.

Dk. Mabodi ameeleza kwamba dhamira ya mafunzo hayo ni kuwajengea uwezo watendaji hao ili waweze kutekeleza majukumu yao kwa ufanisi.

Akiwasilisha mada ya muundo wa CCM na namna unavyofanya kazi, Mkufunzi kutoka Makao Makuu ya CCM Dodoma, Filbert Mdaki Mampwepwe  amesema chama hicho ni zao la muungano wa vyama vya ukombozi vya ASP na TANU, hivyo ni wajibu wa kila mwanachama kulinda na kutetea urithi huo popote bila hofu.

Ameeleza kwamba toka kuzaliwa kwa chama hicho 5 februari, 1977 kimepitia katika mabadiliko mbali mbali ya kisera na kimuundo yenye malengo ya kwenda sambamba na matakwa ya Katiba ya CCM na Kanuni zake.

Nao baadhi ya washiriki wa mafunzo hayo waliahidi kuyafanyia kazi kwa vitendo katika sehemu zao za kiutenda kwa lengo la kuimarisha uhai wa Chama.