DC Miecheweni Alivyofungua Mafunzo ya Kuwajengea Uwezo Wanafunzi Juu ya Elimu ya Afya ya Uzazi na Ushiriki Katika Uandaaji wa Vipindi Vya Redio

Mkuu wa wilaya ya micheweni Salama Mbarouk Khatib amewataka wanafunzi wanaoshiriki mafunzo ya Afya ya uzazi kuwa makini wakati wa mafunzo watakayo yapata kutoka Shirika la Elimu Sayansi na Utamaduni (UNESCO) ili kuifikisha elimu hiyo kwa wanafunzi wenzao na jamii kwa ujumla.

Ameyasema hayo wakati akifungua mafunzo hayo ya siku sita ya kuwajengea uwezo wanafunzi uelewa wa elimu ya jinsia, afya ya uzazi na ushiriki katika uandaaji wa vipindi vya redio katika sikuli ya Chwaka Tumbe wilaya ya Micheweni.

Amesema endapo wanafunzi watayasikiliza mafunzo hayo kwa umakini watakuwa walimu wa kutoa elimu juu ya masuala mbalimbali ikiwemo afya ya uzazi.

“Endapo kama mutayazingatia mafunzo haya yatawasaidia sana katika kupambana na masuala ya udhalilishaji lakini pia suala la UKIMWI na kuondokana na Ndoa za Utotoni.” Alisema Salama.

Mkuu huyo wa wilaya ameyataja baadhi ya masuala ambayo yamekuwa yakiirejesha nyuma jamii ya Micheweni kuwa ni kuendelea kukithiri kwa vitendo vya udhalilishaji pamoja na elimu ndogo ya Afya ya uzazi kwa vijana.

Aidha ametumia nafasi hiyo kulipongeza shirika la, UNESCO kwa juhudi walizo zifanya na kuamua kutoa elimu katika wilaya ya micheweni kuhusiana na suala zima la Afya ya Uzazi.

“nipende kuchukua nafasi hii kuwapongeza UNESCO kwa maamuzi ya kuichagua Micheweni kwaajiri ya kuja kutoa elimu hii muhimu kwa vijana wetu, niombe na mashirika mengine yaige mfano huu.” Alisema mkuu huyo. 

Katika hatua nyingine bi Salama amewataka maafisa waandamizi kutoka wizara ya elimu kuvitumia vyombo vya habari ikiwemo kituo cha redio jamii micheweni ili kutoa ripoti za masuala mbalimbali yanayohusu elimu.

Kwa upande wake kaimu afisa elimu wilaya ya micheweni, Mwalimu Bakari Khamis Juma, amewataka wanafunzi hao kutoa ushirikiano kwa wawezeshaji ili waweze kujifunza mambo mengi zaidi.

Mafunzo ya kuwajengea uwezo wanafunzi kushiriki katika uandaaji wa vipindi vya redio na elimu ya afya ya Uzazi yanawashirikisha wanafunzi kutoka shule Nne za wilaya ya Micheweni, Walimu Pamoja na Wazazi.