UNESCO: Tumieni Kituo cha Redio Micheweni Kutatua Changamoto Zenu

mwezeshaji wa mafunzo ya Elimu ya afya ya Uzazi na Elimu kwa mtoto wa kike yanayoendeshwa na UNESCO, Rose Haji Mwalim akitoa mafunzo kwa washiriki wa mafunzo hayo.

Shirika la Umoja wa Mataifa linaloshughulikia masuala ya Elimu,  Sayansi na Utamaduni (UNESCO) limeitaka jamii ya watu wa Micheweni kukikumia kituo cha redio jamii micheweni ili kufikisha taarifa za mambo mbalimbali yanayojitokeza katika jamii kila siku.

Rai hiyo imetolewa na mwezeshaji wa mafunzo ya Elimu ya afya ya Uzazi na Elimu kwa mtoto wa kike yanayoendeshwa na UNESCO, Rose Haji Mwalim, yanayoendelea katika Ukumbi wa Skuli ya sekondari Chwaka Tumbe 

Akiwasilisha mada ya elimu ya utayarishaji wa vipindi vya redio kwa washiriki, Mwalim Rose amesema kuwa walimu wakishirikiana na wanafunzi pamoja na wazazi kupitia vyombo vya habari wanaweza kutatu changamoto zinazowakabili ikiwemo, unyanyasaji wa kijinsia, ubakaji na ulawiti.

Akizitaja baadhi ya mambo ambayo yakuwa yakirudisha maendeleo ya micheweni amesema kuwa ni, kutokuwepo kwa elimu tosherezi ya afya ya uzazi, ubakaji pamoja na ulawiti.

Kwa upande wake mwalimu mshiriki wa mafunzo hayo, Hamad Mbwana Shaame, amelipongeza shirika la UNESCO kwa kutoa elimu hiyo kwa vijana wa Micheweni kwani itawasaidia kupambana na changamoto ambazo zimekuwa zikiikabili jamii ya micheweni kwa siku za hivi karibuni.

Mafunzo  ya Elimu ya afya ya Uzazi na Elimu kwa mtoto wa kike yanayoendeshwa na UNESCO yana lengo la kuunda Vikundi vya Vijana Shuleni na Akina Mama Watayarishaji Vipindi vya redio kwa kushirikiana na Redio Jamii Micheweni, ambavyo vitasambaza Elimu rika kwa Vijana na Akina Mama.