Kuelekea Maadhimisho ya Siku ya Wafanyakazi, Shirikisho la Wafanyakazi Zanzibar laitaka SMZ kujipanga Kikamilifu

 

KATIBU Mkuu wa Shirikisho la wafanyakazi Zanzibar Khamis Mwinyi Mohammed ameitaka Serikali ya Mkoa wa Kaskazini Pemba , kujipanga kwa ajili ya kufanikisha sherehe za maadhimisho ya siku ya wafanyakazi .

Amesema ni vyema Uongozi wa Serikali hiyo kuanza  kuwahamasisha wakuu wa taasisi za Serikali na binafsi ili waweze kushiriki katika maadhimisho hayo ambayo kwa mwaka 2018 yanatarajia kufanyika mkoa huo.

Kauli hiyo ameitoa wakati akizungumza na uongozi wa Kamati ya Ulinzi na Usalama Mkoa huo  katika ukumbi wa mikutano wa Ofisi ya Mkuu wa Mkoa kwenye kikao cha kujadili na kupanga mikakati ya kufanikisha sherehe hizo  .

Aidha ameshauri kuundwe kamati ambazo zitakuwa na jukumu la kusimamia na kuratibu maandalizi ya sherehe ambayo mgeni rasmi anatarajia kuwa ni Rais wa Zanzibar na Mwenyekiti wa Baraza la Mapinduzi Dr Ali Mohammed Shein .

Mwenyekiti wa kamati ya Ulinzi na Usalama Mkoa huo Mhe Omar Khamis Othman amepongeza uwamuzi wa Shirikisho la wafanyakazi Zanzibar kwa kuchagua mkoa huo kuwa mwenyeji wa kilele cha mei mosi.

Amesema Serikali ya Mkoa kupitia vyombo vyake vya ulinzi na usalama itahakikisha amani na utulivu unakuwepo muda wote wa maadhimisho ya sherehe hizo.