Rais wa Zimbabwe afanya majumuisho ya mafanikio yaliyopatikana tangu aingie madakarani

Rais Emmerson Mnangagwa wa Zimbabwe amefanya majumuisho kuhusu mafanikio yaliyopatikana kwenye serikali yake katika siku mia moja za mwanzo tangu aingie madarakani, na kuahidi kufanya mageuzi zaidi ili kuboresha uchumi wa nchi.

Rais Mnangagwa aliyeingia madarakani tarehe 24 Novemba, amesema kazi zinazoikabili serikali yake katika siku za baadaye zinahitaji juhudi za kila mtu, na itachukua muda kabla ya matunda ya mageuzi kuonekana.

Rais Mnangagwa amesema serikali ilipitisha bajeti yenye ufanisi ambayo inapunguza matumizi yasiyo ya lazima, pia imeondoa sheria kadhaa za upendeleo, ili kuvutia uwekezaji zaidi wa moja kwa moja kutoka nchi za nje.

Pia amesema serikali yake imekuwa ikifanya juhudi za kujenga mahusiano ya kimataifa na kuvutia uwekezaji, na hadi sasa imepata uwekezaji wa dola bilioni 3 za kimarekani kutoka kwa makampuni makubwa duniani.