Wajasiriamali Kisiwani Pemba Wapata Elimu Mpya

 

WIZARA ya Kilimo , Maliasili ,Mifugo na Uvuvi, Pemba imewashauri wakulima na wajasiriamali kuendeleza taaluma waliopatiwa juu ya isindikaji na usarifu wa mazao, kwa wakulima wenzao, ili kuongeza ubora wa bidhaa wanazozizalisha.

Ushauri huo umetolewa na Afisa Kiungo program za ASSP/ASDP-L kutoka Wizara ya Kilimo, ASHA OMAR FAKIH, wakati wa uzinduzi wa kituo cha usindikaji na usarifu wa mazao, huko Pujini, Mkoa wa kusini Pemba.

Aidha amesema kuwa lengo la mafunzo hayo ni kuwawezesha wakulima kupata elimu ya kusarifu mazao yao katika ubora na utaalam zaidi.

Kwa upande wake, muwezeshaji wa mafunzo ya usindikaji na usarifu wa mazao, FATMA MOHAMMED MZEE, amesema kuwa uwepo wa kituo hicho utasaidia kwa kiasi kikubwa kuongeza ubora wa uzalishaji na kupata soko ndani na nje ya nchi.

Kwa upande wao wakulima na wajasiriamali wameahidi kuyatumia ipasavyo mafunzo hayo, ili waweze kujiongezea kipato kitokanacho na mazao yao

Mafunzo ya usarifu wa mazao, pamoja na usindikaji wa matunda na mboga mboga ni mafunzo ya siku nne yalioandaliwa na Program za kuendeleza sekta ya kilimo na mifugo, ambayo yamewashirikisha zaidi wakulima waliopatiwa taaluma ya uzalishaji, kati yao ishirini kutoka Mkoa wa kaskazini na ishirini kutoka Mkoa wakusini Pemba.