Mh. Samia Suluhu Aridhishwa na Amani iliyopo Kisiwani Pemba

MAKAMO wa Rais wa Jamhuri ya Muungano wa Tanzania Samia Suluhu Hassan amesema Serikali imeweka mkazo maalum katika kuimarisha huduma za afya hasa za mama na mtoto ili kupunguza vifo vinavyotokea wakati wa kujifungua.

Makamo wa Rais ameyasema hayo huko Shehia Shumba Vyamboni katika Wilaya ya Micheweni Mkoa wa Kaskazini Pemba wakati alipokuwa akizungumza na wananchi mara baada ya kuweka jiwe na msingi katika kituo cha afya cha huduma za mama na mtoto .

Amesema kwa makisio kila mwaka akina mama mia nne kati ya laki moja hupoteza maisha kwa sababu mbali mbali zitokianazo na uzazi moja wapo ni kuchelewa kufikishwa katika vituo vha afya na hospitali.

Aidha amewataka wananchi wa shehia hiyo kukitumia kituo hicho pamoja na kuilinda miundo mbinu yake ili kiweze kudumu na kutumika kwa muda mrefu kama ilivyokusudiwa na kiweze kutoa huduma bora kwa manufaa ya umma.

Mapema akimkabirisha Makamo wa Rais , Waziri wa Nchi . Ofisi ya Makamo wa Pili wa Rais Zanzibar Mohammed Abod Mohammed amesema miongoni mwa mikakati ya Serikali ya Mapinduzi ya Zanzibar ni kuimarisha huduma za afya kwa wananchi wake.

Aidha amefahamisha kwamba ujenzi wa Kituo hicho ni moja ya malengo la Mapinduzi ya Zanzibar ya kuhakikisha kwamba kila mwananchi ananufaika na matunda yake ambapo kituo hicho ni moja ya matunda ya Mapinduzi .

“Moja ya malengo ya matunda ya Mapinduzi ya Januari 1964 ni kuhakikisha wananchi wa Zanzibar wananufaika na huduma bora za afya , kwamba ujenzi wa kituo hichi ni utekelezaji wa azma ya Mapinduzi hayo
”alifahamisha.

Wakati huo huo , Makamo wa Rais pia amemtembelea mwasisi wa Chama Cha Mapinduzi Mrashi Seif Khamis huko Shehia ya Sizini na kukabidhi msaada wa mabati kwa ajili ya kuezeka nyumba yake iliyojengwa kwa mchango wa wanaCCM wa Wilaya ya Micheweni.

Pia Makamo wa Rais amepata fursa ya kuweka jiwe la msingi ujenzi wa Tawi la CCM Shehia ya Ukunjwi Wilaya ya Wete na kuwapongeza wanaCCM kwa kuendelea kudumisha umoja na mshikamano.

MATUKIO KATIKA PICHA