'Wazanzibar Tutembelee Maeneo ya Historia Kujifunza'

Wananchi wametakiwa kuwa na mwamko wa kutembelea sehemu za kihistoria ili kujua historia ya nchi yao pamoja na kujifunza utamaduni uliopo Zanzibar.

Akizungumza na Micheweni FM Ofisini kwake Kisonge Mjini Unguja, Msimamizi wa Makumbusho katika mnara wa kumbukumbu Kisonge Maneno Ibrahim khamis amesema baadhi ya wananchi hususan vijana wamekuwa na muamko mdogo wakujitokeza katika maeneo ya kihistoria na kupelekea kutojua historia ya nchi.

Amesema Zanzibar ni sehemu ambayo ina utajiri mkubwa  wa kihistoria  hivyo ni vyema wananchi kutembelea maeneo hayo ili kujifunza watanufaika na vitu vingi ikiwemo kujua matukio mbalimbali yaliyofanyika Zanzibar kabla na baada ya Mapinduzi.

Aidha amesema kujua historia ya Nchi itawawezesha  vijana kutambua mila na desturi za wazazi wao na kuachana na mila za Nchi za kigeni ambazo zinaharibu utamaduni wa mzanzibar hususani kwa vizazi vijavyo.

Hata hivyo amesema ukuwaji wa uchumi unachangiwa na sehemu za kihistoria kutokana na wageni kutoka nchi mbali mbali kuja kujifunza Historia ya Zanzibar hivyo ni vyema kwa wananchi kuimarisha mashirikiano katika kujifunza ili kuchangia pato la taifa letu.