Balozi Seif aonya Ujenzi kataka Vyanzo vya Maji

MAKAMU wa Pili wa Rais wa Zanzibar, Balozi Seif Ali Iddi, akizindua mradi wa visima vya maji vilivyochimbwa na Taasisi ya Zanzibar Relief and Development Foundation (ZARDEF) chini ya usimamizi wa ubalozi wa Uturuki nchini Tanzania katika vijiji vya Donge na Mahonda.

MAKAMU wa Pili wa Rais wa Zanzibar, Balozi Seif Ali Iddi, amehimiza wananchi kuacha kuharibu mazingira na kujenga katika vianzio vya maji, kwani kunachangia upungufu wa huduma hiyo.

Alieleza hayo katika hafla ya ufunguzi wa visima vya maji safi na salama katika skuli ya msingi Mahonda na kituo cha afya Donge Mbiji Mkoa wa Kaskazini Unguja, vilivyofadhiliwa na taasisi ya ZARDEFO FOUNDATION kupitia ubalozi wa Uturuki nchini Tanzania.

Alisema wapo baadhi ya watu kwa makusudi wanakata miti ovyo na kuharibu miundombinu ya huduma za kijamii jambo ambalo linarudisha nyuma juhudi za serikali na washirika wa maendeleo katika kutatua changamoto zilizopo.

Alisema ni lazima wananchi wawe na utamaduni wa kuheshimu na kuitunza miundombinu inayojengwa kwa ajili ya upatikanaji wa huduma za  kijamii, yakiwemo maeneo ya skuli.

Alikiri kwamba wananchi wanakabiliwa na shida ya maji safi na salama  hasa katika mkoa wa kaskazini Unguja, hivyo ili kuikabili shida hiyo ni vyema jamii kuvilinda vianzio vya maji.

Aliahidi serikali itayafanyia kazi maombi ya taasisi hiyo ikiwemo kutoa ushirikiano katika miradi ya kilimo cha mboga na uvuvi, inayotarajia kuianzisha.

“Ajira sio kufanya kazi serikalini pekee badala yake ni sehemu yoyote ambayo utapata kipato  cha halali, tujitahidi miradi inapokuja tuipokee kwa ajili ya maslahi ya vijana wetu,” alisema.

Waziri wa Fedha na Mipango, Dk. Khalid Salum Mohamed, alisema kutokana na ongezeko la idadi ya watu, kumeibuka mahitaji makubwa ya maji safi na salama.

Hata hivyo, alisema serikali inaendeleza juhudi za kuimarisha miundombinu ya maji ili kuwapunguzia shida wananchi wake.