DC MICHEWENI: VIJANA DHIBITINI MIHEMUKO YA MIILI YENU

MKUU wa Wilaya ya Micheweni Bi Salama Mbarouk Khatib amewataka vijana  kudhibiti mihemko ya miili yao kwa kutambua thamani yao ili kuzuia mimba za umri mdogo pamoja na vitendo vyengine vya udhalilishaji.

Amesema vitendo vya udhalilishaji vinavyotokea siku hadi siku vinachangiwa na baadhi ya  vijana kushindwa kuidhibiti mihemko na hivyo kufanya maamuzi yasiyo sahihi juu ya maisha yao .

Hayo yameelezwa na Afisa wa Wanawake Wilaya  hiyo Bizume Haji Zume kwa niaba ya Mkuu wa Wilaya , wakati akifungua kongamano la kupinga mimba za utotoni pamoja na vitendo vya udhalilishaji lililofanyika kwenye ukumbi wa Skuli ya Sekondari ya Micheweni.

 Amefahamisha kwamba wanakabiliwa na changamoto nyingi ikiwemo ya utumiaji wa dawa za kulevya , ubakaji pamoja na wizi , hivyo wanapaswa kupunguza mihemko kwa faida yao na jamii kwa ujumla.

Naye Afisa Vijana Wilaya ya Chake Chake  Omar Abeid Ali  amewataka vijana kujitambua na kujiepusha na vikundi viovu ambavyo vinaweza kuleta athari katika maisha yao .