RC KAS PEMBA AKUNWA NA MWENENDO WA KAMATI YA ULINZI NA USALAMA WILAYA YA MICHEWENI

MKUU wa Mkoa wa Kaskazini Pemba Mhe. Omar Khamis Othman ameipongeza kamati ya ulinzi na usalama ya Wilaya ya Micheweni inayoongozwa na Mkuu wa Wilaya hiyo Salama Mbarouk Khatib kwa kufuata maagizo aliyoyatoa ya kupambana na Madawa ya kulevya na pombe haramu.

Akizungumza na mwandishi wa habari  hii amesema kuwa kamati hiyo inafanya kazi kwa mujibu wa matakwa ya Serikali ilivyo agiza.

Mkuu huyo wa mkoa amesema licha ya juhudi ambazo zinaendelea kuchukuliwa na kamati hizo za wilaya lakini bado kuna baadhi ya viongozi wanarejesha nyuma utekelezaji wa zoezi hilo.

“Tumepata taarifa kuwa kuna baadhi ya viongozi wa serikali ambao bado hawaungi mkono juhudi hizi, lakini niwahakikishie tu kwamba serikali haitakuwa tayari kumvumilia mtu ambae ataonekana kwenda kinyume na matakwa ya serikali,” alisema Othuman.

Mapema akithibitisha taarifa za kukamatwa kwa watuhumiwa wa dawa za kulevya katika wilaya ya Micheweni, Kamanda wa Polisi Mkoa wa Kaskazini Pemba Haji Khamis Haji, alisema katika oparesheni hiyo vijana watatu walibainika wakiwa na Dawa za kulevya aina ya Bangi.

“Katika Oparesheni iliyofanyika April 2, na kamati ya Ulinzi na Usalama ya Wilaya Micheweni Shehia ya Makangale, ilifanikiwa kuwakamata vijana hao watatu wakiwa na dawa za kulevya aina ya Bangi Nyongo nne,” alisema Kamanda huyo.

  Akiwataja watuhumiwa hao kamanda Haji alisema kuwa watuhumiwa waliokamatwa ni Hamis Haji Ali 37, aliyekamatwa na Nyongo Mbili za Bangi, Miraji Salim Nassor 23 Nyongo moja na Faki Ali Rashid 20 nyongo moja wote wakazi wa Makangale.

Nae Mwenyekiti wa Kamati ya Ulinzi na Usalama wilaya hiyo Bi Salama Mbarouk Khatib, alisema katika oparesheni hiyo wamejipanga kuhakikisha kwamba Wilaya ya Micheweni haiwi genge la kuingiza madawa ya kulevya.

“Kamati ya Ulinzi na usalama wilaya ya Micheweni tumejipanga kuhakikisha tunatokomeza aina yoyote ya vitendo vya uhalifu ikiwemo kupambana na madawa ya kulevya na Pombe haramu ili kuwafanya wananchi wetu wajihusishe na shughuli halali za maendeleo,” alisema Mkuu huyo wa Wilaya.

Oparesheni ya kutokomeza madawa ya kulevya na pombe haramu inaendelea katika wilaya ya Micheweni ikiwa chini ya Mkuu wa wilaya hiyo.