Miamba sita hatarini kushuka Ligi Kuu Pemba

 

WAKATI Ligi Kuu ya Zanzibar kanda ya Pemba ikielekea ukingoni, timu sita zipo kwenye hatari ya kushuka daraja msimu ujao.

Miamba hiyo ni pamoja na Okapi, Chuo Basra, Younger Islander, Dogomoro, FSC na Kizimbani.

Baadhi ya timu hizo tayari zimebakiwa na michezo mitatu na nyengine miwili.

Hata hivyo, ligi hiyo imefikia patamu kwa timu zilizoko katika nafasi ya kuwemo kwenye nne bora ambazo hatimaye zitacheza hatua ya nane bora ya Ligi Kuu ya Zanzibar.

Vigogo hivyo ni Mwenge, Opec, Rock, Jamhuri, Shaba, Chipukizi, New Star na Wawi.

Mwenge ndiyo inayoongoza ligi hiyo ikijikusanyia pointi 47,ikifuatiwa na Opec yenye pointi 43,Hard Rock pointi 40 na Jamhuri yenye pointi 38.

Katika mchezo uliopigwa uwanja wa Gombani juzi huku mvua kubwa ikiendelea kunyesha, Kizimbani iliibuka na ushindi wa magoli 7-1 dhidi ya Okapi.

Mchezo huo ulishuhudiwa na mashabiki wachache uwanjani hapo huku baadhi yao wakipiga kelele wakidai kulikuwa na upangaji wa matokeo.

Magoli ya Kizimbani yalifungwa na Khatib Hassan (dk.ya 11 na 63), Abdalla Hamad (dk.ya 57,69 na 84), Mohamed Seif (dk.ya 78) na Ali Othaman Ali (dk.ya 66).

Okapi walipata bao la kufutia machozi kupitia kwa Suleiman Amour kwenye dakika 18.

Hata hivyo, baadhi ya wachezaji wa Okapi walionekana wakali kwa wenzao kutokana na kuruhusu magoli mengi kama hayo.

Kufuatia hali hiyo, wachezaji wawili wa safu ya ulinzi ya Okapi, Khatib Hassan na Hamad Seif waliamua kucheza nafasi za mbele kutokana na mashabiki kuwashtukia kucheza chini ya kiwango.