RUSHWA MUHALI, SULUHU KESI ZA UDHALILISHAJI ZAPIGWA MARUFUKU

 

WARATIBU  wa wanawake na watoto wilaya ya wete wametakiwa kuacha rushwa muhali pamoja na kujiepusha na kushiriki kufanya suluhu juu ya matendo ya udhalilishaji yanapotokea katika maeneo yao.

 Katibu Tawala Wilaya ya Wete Bi Mkufu Faki Ali akizungumza na waratibu amesema Serikali imekusudia kuyatokomeza matendo hayo , hivyo ni jukumu la waratibu kusimamia na kutoa taarifa sahihi na za mapema yanapotokea katika shehia zao.

Amewataka waratibu kuhakikisha kesi zote za udhalilishaji  zinar ipotiwa sehemu husika ili wahusika waweze kuchukuliwa hatua kwa mujibu wa sheria za nchi .

Naye Afisa Ustawi wa Jamii wilaya hiyo Haroub Suleiman Hemed amesema baadhi ya waratibu wanashiriki kufanya suluhu ya matendo hayo na baada ya akushindwa kufikia makubaliano kesi hizo huziripoti sehemu husika kwa hatua za kisheria.

 Haroub amefahamisha kwamba kesi nyingi zinazotokea hasa maeneo ya vijijini hushindwa kuripotiwa sehemu husika na badala yake waratibu kushiriki kuzipatia suluhu jambo ambalo ni kosa kisheria.

Washiriki wa kikao hicho wameishauri jamii kushirikiana katika kupiga vita matendo hayo ambayo yanazidi kushamiri katika Mkoa wa Kaskazini Pemba hususani wilaya ya wete.