TRA: Mapato yanayokusanywa Zanzibar yanapelekwa Hazina Kuu

MAMLAKA ya Mapato Tanzania (TRA) Ofisi ya Zanzibar imesema mapato yanayokusanywa na Mamlaka hiyo kwa upande wa Zanzibar , zinabaki kwenye mfuko Mkuu wa hazina wa Serikali ya Mapinduzi na zinatumika kwa ajili ya  kutoa  huduma kwa wananchi wa Zanzibar.

Afisa wa Elimu kwa mlipa Kodi wa Mamlaka hiyo Zanzibar Abdalla Seif Abdalla amesema tofauti inavyodaiwa na baadhi ya watu kwamba fedha hizo hupelekwa Tanzania Bara na kwa wananchi wa Zanzibar hawanufaiki na mapato yao .

Akizungumza na waandishi wa habari kutoka vyombo vya mbalia mbali vya habari , kwenye ukumbi wa Baraza la Mji Chake Chake Abdalla amewataka waandishi wa habari kutumia vyema vyombo vyao  vya habari kuwaelimisha wananchi jinsi fedha hizo zinavyotumika .

“ Fedha zinazokusanywa na TRA kwa upande wa Zanzibar kuingizwa kwenye mfuko mkuu wa hazina Zanzibar na zinatumika katika shughuli za maendeleo kwa wananchi wa Zanzibar na sio vyenginevyo ”alifahamisha.

Naye  Afisa Mdhamini Mamlaka ya Mapato (TRA) Pemba Habib Sultan amewataka waandishi wa habari kushirikiana na watendaji wa Mamlaka kutoa elimu kwa wananchi hususani wafanyabiashara kutambua umuhimu wa kulipa kodi .

Amesema kulipa kodi ni jambo la lazima kwa anayestahili , hivyo ni jukumu la waandishi wa habari kuvitumia vyombo vyao vya habari kuifikisha elimu ya kulipa kodi kwa wananchi , ili kila nayestahili aweze kushiriki katika kuchangia uchumi wa nchi .

Akitoa neno la shukrani , Mwenyekiti wa klabu ya waandishi wa habari Pemba (PPC) Said Mohammed ameahidi kuwa waandishi wa habari wataendelea kushirikiana na TRA kuhamasisha wananchi kulipa kodi .

Aidha amesema kupitia taarifa na vipindi ambavyo vitaandaliwa pia vitatumika kuwafichua wafanyabiashara wanaokwepa kulipa kodi ili waweze kuchukuliwa sheria stahiki .

“Nikuahidi kwamba sisi waandishi wa habari tutauendeleza ushirikiano uliopo kwa kuwaelimisha wananchi umuhimu wa kulipa kodi pamoja na kuwafichua wafanyabiashara wanaokwepa kulipa kodi ”alisisitiza.

Akifunga kikao hicho Mwakilishi wa Jimbo la Chake Chake Suleiman Said Zahran amemwataka waandishi  wa habari kuongeza juhudi za kuwaelimisha wananchi ili waweze kujitokeza kulipa kodi jambo ambalo litasaidia kukua uchumi wa taifa .

Hata hivyo amesema pamoja na changamoto mbali mbali zinazowakabili , ikiwemo ni pamoja na ukosefu wa vitendea kazi wanapaswa kuwa wazalendo wa taifa lao kwa kuhakikisha wanafanya kazi kwa kuangalia maslahi ya nchi .