Elimu mbadala kuendelea kutoa mafunzo kwa Vijana Zanzibar

MKURUGENZI wa Elimu Mbadala na watu wazima Zanzibar  Mashavu Ahmada Fakih amesema kwamba Idara yake itaendelea kutoa mafunzo ya fani ya taaluma ili kuwajengea uwezo vijana walioshindwa kuendelea na masomo na watu wazima kujiajiri au kuajiriwa.

Amesema lengo la Idara hiyo ni kuwajengea uwezo wawezeshaji katika vituo mbalimbali ,kutumia mbinu shirikishi  kuwawezesha  wanafunzi kupata ufaulu kuendana na mabadiliko ya kidunia ya sayansi na tecknologia.

Mashavu amesema hayo katika  kituo cha Elimu Mbadala Wingwi Wilaya ya Micheweni alipokua akifungua mafunzo ya siku tisa kwa wawezeshaji wa vituo vya elimu mbadala na fani ikiwa ni mfululizo wa mafunzo endelevu kwa watendaji wake.

‘’Idara imeandaa mafunzo haya kwa ajili ya kuwajenga uwezo walimu wanaosomesha madarasa ya elimu mbadala na watu wazima ili waweze kupata  mbinu za kuwafundisha na kuongeza ufaulu ’’alieleza.

Amesema saikolojia yakufundisha watu wazima inataka busara ,upole, upendo  na utulivu ,hivyo amewataka wawezeshajai hao kutumia lugha nzuri kwa kutambua shida zao na kuishi nao kirafiki ili  kuona mafunzo hayo yanawatoa katika kufanyakazi kwa mazoea na wanatumia elimu wanayoipata .

Aidha Mashavu amefahamisha kwamba Idara imeanzishwa mitaala ya somo la kiingereza kwa wanakisoma , ili kuwajengea mazingira mazuri ya kujiajiri kupitia sekta ya utalii .

Mratibu wa Elimu Mbadala na Watu Wazimu Pemba  Hija Hamad Issa amewasisitiza washiriki wa mafunzo hayo kutumia maarifa baada ya mafunzo kuwawezesha kutumia vitabu na mbinu mpya kwa faida yao na taifa.

Amesema kuwa mafunzo hayo yataleta mabadiliko  katika utendaji wao wa kazi , ambapo wanatakiwa kutumia  mbinu ambazo zitawafanya wanafunzi kupenda kuhudhuria masomo yao .

Naye mwalimu wa somo ya Saikolojia Haji Juma amesema kuundisha mtu mzima yataka moyo wa ujasiri na upendo ili kuweza kufanikisha lengo lililokusudiwa .

Hivyo amewataka washiriki wa mafunzo hayo kuhakikisha wanakuwa karibu na wanafunzi kwa kujenga nao urafiki na kuwasaidia wanapokuwa na shida .